Бүгінде Әл-Фараби атындағы ҚазҰУ тек қазақстандық емес, шетелдік жастар үшін де тартымды білім ордасына айналып отыр. Соның айқын дәлелі – Ресей Федерациясының Санкт-Петербург қаласынан келген 4-курс студенті Дмитрий Васильев. Ол ҚазҰУ-дың шығыстану факультетінде білім алып, хинди тілін меңгеруде.
Дмитрийдің айтуынша, Қазақстандағы жетекші университеттердің бірі саналатын Әл-Фараби атындағы ҚазҰУ-ды таңдауына оқу орнының академиялық беделі мен шығыстану саласындағы мықты ғылыми мектебі әсер еткен.
– Мен Санкт-Петербург қаласынан келіп, осы университетте «Шығыстану» мамандығы бойынша білім алдым. Университеттің оқу бағдарламасы, тәжірибелі оқытушылар құрамы және халықаралық бағыттағы пәндер мені бірден қызықтырды, – дейді ол.
Студенттің таңдауы хинди тіліне түсуі де кездейсоқ емес. Оның айтуынша, Үндістанның бай мәдениеті, көне тарихы мен философиялық дүниетанымы жас зерттеушінің ғылыми қызығушылығын оятқан.
– Хинди тілі – қарым-қатынас құралы ғана емес, тұтас бір өркениеттің кілті. Бұл тілді меңгеру арқылы үнді халқының рухани әлемін, салт-дәстүрін тереңірек түсінуге болады, – деп ойымен бөлісті Дмитрий.
Қазақстанда оқу студентке кәсіби білім ғана емес, жаңа мәдени ортаға бейімделу тәжірибесін де берген. Ол қазақ халқының қонақжайлығы мен ашық мінезін ерекше атап өтті.
– Мұнда өзімді бөтен сезінбедім. Адамдар өте жылы шырайлы, көмектесуге әрдайым дайын. Бұл шетелдік студент үшін аса маңызды, – дейді ол.
Ол хинди тілін меңгеру барысында белгілі бір қиындықтар да болғанын жасырмайды. Әсіресе тілдің грамматикалық құрылымы мен деванагари жазуы бастапқы кезеңде күрделі көрінген.
– Дегенмен жүйелі оқу мен оқытушылардың қолдауының арқасында бұл қиындықтарды жеңуге болады, – дейді студент.
Осы студенттік жылдарда Д.Васильев жас ғалымдарға арналған «Фараби әлемі» конференциясына қатысып, 2-орын иеленіп, өзінің ғылымға деген ерекше қабілетін көрсетті.
Болашақта Дмитрий Үндістан мен Орталық Азия елдері арасындағы мәдени-тілдік байланыстарды зерттеп, халықаралық білім беру немесе аударма саласында еңбек етуді жоспарлап отыр. Қазіргі уақытта шетелдік студент Астана қаласында Үндістан Республикасының Қазақстандағы елшілігінде өндірістік тәжірибеден өтіп, Свами Вивекананда атындағы үнді мәдени орталығында хинди тілінен сабақ беріп жүр. Сөз соңында ол Әл-Фараби атындағы ҚазҰУ-да білім алғысы келетін шетелдік жастарға кеңесін де айтты.
– Ең бастысы – таңдаған мамандыққа қызығушылық танытып, жаңа мәдениеттерге ашық болу. Бұл университет сапалы білім алып қана қоймай, тұлға ретінде қалыптасуға үлкен мүмкіндік береді, – деп түйіндеді ойын Дмитрий.
Бота БОКУЛЕВА,
Зәуре ИСКАКОВА,
шығыстану факультетінің аға оқытушылары
Басқа жаңалықтар
