Yнемі ізденісте жүретін студент

Білімге ұмтылыс, ғылымға қызығушылық, өнерге құштарлық және заманауи технология­лар­ды меңгеруге деген талпыныс – бүгінгі жас ұрпақтың жан-жақты дамуының айқын көрінісі. Осындай биік талап пен ізденісті бойына тоғыстырған талантты жастың бірі – Әл-Фараби атындағы Қазақ ұлттық универси­те­тінің 4-курс студенті Айжан Әлімбек.

Айжан Қуатқызы 2006 жылы Алматы қаласында дүниеге кел­ген. 2023 жылы Алматы қа­­ла­сындағы №148 мек­теп-гим­на­зияны үздік тамамдап, «Қызыл аттестат» иегері атан­­ды. Сол жылы ҚазҰУ-дың география және табиғатты пай­­­­далану факультетіне мем­ле­кеттік грант негізінде оқуға түсіп, «6В07303 – Жерге орналастыру» білім беру бағдар­ла­масы бойынша білім ала бас­тады.

Қазақ, орыс және ағылшын тілдерін еркін меңгерген Айжан оқу мен тәжірибені ұштастыра білетін, үнемі ізденісте жүретін студент ретінде ерекшеленді. Ол университет қабырғасында оқу озаты ғана емес, қоғамдық белсенділігі, жауапкершілігі және ұйымдастырушылық қа­білетімен де танылып ке­­леді. Студенттік өмірде көш­­­бас­шы­лық қасиетін ай­­қын көрсете білген Айжан бір­неше жыл бойы топ ста­рос­тасы ретінде өзіне жүктелген міндеттерді жоғары жауапкершілікпен атқарды. Оның бастамашылдығы мен іскерлігі курстастарына да үлгі.

Айжанның ғылыми-зерттеу бағытындағы жетістіктері де ерекше атап өтуге лайық. Әл-Фараби атындағы ҚазҰУ-дың «Фараби әлемі – 2024» халықаралық ғылыми конференциясында «Жер дег­ра­да­ция­­сы және оны шешу жол­дары» тақырыбындағы ғы­лыми жұ­мы­сын қорғап, «Жерге орналас­тыру» секциясы бойынша III дәрежелі дип­ломмен марапатталды. Со­нымен қатар ғылыми мақа­ла­лары жарық көріп, зерттеу жұмыстарына белсенді қа­тысып келеді.

Кәсіби білімін жетілдірумен қатар, Айжан заманауи ци­­фр­лық технологияларды мең­ге­руге де ерекше көңіл бөледі. 2026 жылы халықаралық AI-SANA бағдарламасының «Intellectual Technologies and Entrepreneurial Thinking» оқу курсын 135 академиялық сағат көлемінде сәтті аяқтап, халық­ара­лық сертификатқа ие бол­ды. Сондай-ақ Huawei Talent ха­лықаралық білім беру плат­фор­масындағы «AI Basics: Overview of AI» және «Search and AI» курстарын табысты та­мамдады. Бұл оның заман та­лабына сай білім алуға, жа­санды интеллект пен инно­вациялық технологияларды кәсіби қыз­метімен ұштастыруға ұм­­ты­лысын көрсетеді.

2026 жылы Айжан ҚазҰУ-да өткен XVIII республикалық пәндік олимпиадада «Жерге орналастыру» білім беру бағ­дарламасы бойынша жүлделі II орынға ие болды. Бұл оның кәсіби білімінің тереңдігін, теориялық білімін практикамен ұштастыра алатынын және таңдаған мамандығына деген қызығушылығының жоғары екенін дәлелдейтін маңызды жетістік.

Айжанның болмысы тек ғылым мен біліммен шек­тел­мейді. Өнер саласында да өзіндік қолтаңбасын қа­лып­тастырған шығармашыл сту­­дент. «Farabi Fest-2023» бай­қауында халық биінен бас жүлдені, классикалық биден I орынды, заманауи биден II орын­ды иеленіп, Ыстықкөлге жол­дама жеңіп алды. Бір бай­қауда өнердің бірнеше бағыты бойынша жоғары нә­тиже көрсетуі оның таланты мен табандылығының айқын дәлелі.

Факультеттің қоғамдық және мәдени өміріне де бел­сенді араласатын Айжан 2024 жылы «Ең үздік студенттік топ» жобасында топ басшысы ре­тінде факультет намысын қорғап, ұйымдастырушылық қабілетін таныта білді. Ол өз командасын біріктіріп, ортақ мақсатқа жұмылдыра алатын көшбасшы екенін тағы бір мәрте дәлелдеді. Жоғары академиялық үлгерімі, ғы­­лы­ми-зерттеу қызметіндегі бел­сенділігі мен қоғамдық жұ­мыстарға қосқан үлесі ескеріліп, 2025-26 оқу жылында Айжан Қуатқызы Қазақстан Республикасы Президентінің стипендиясына ие болды. Бұл жас студенттің бірнеше жыл бойғы табанды еңбегі, ізденісі және жетістіктерінің лайықты бағасы.

Айжанның бойындағы ең басты қасиеттердің бі­рі – өзін үнемі дамытуға де­ген ұм­т­ы­лысы. Ол бір ме­зет­те білімге, ғылымға, қоғам­дық жұмысқа, цифрлық тех­но­логияларға және өнерге уақыт бөліп, әр ба­ғытта нәтижеге жете білді. Ашық мінезі, сы­пайы­лығы, кіші­пейілдігі мен адамдармен тез тіл табыса білуі оның тұлғалық болмысын одан әрі аша түседі.

Бүгінде Айжан Әлімбек – университетіміздің білімді де белсенді, ізденімпаз әрі жан-жақты дамыған студенттерінің бірі. Оның әрбір жетістігі – ты­нымсыз еңбектің, нақты мақ­саттың және өзіне деген сенімнің нәтижесі. Жасампаз жастың жарқын жетістігі бүгінгі марапатпен ғана өлшенбейді. Ол – болашаққа жасалған нық қадам. Айжанның білім мен ғылымды, заманауи технология мен шығармашылықты қатар алып жүруі оның болашақта кәсіби маман ретінде де, қоғамға пайдасын тигізетін білікті тұлға ретінде де биік белестерді бағындыратынына сенім ұялатады.

Өкетай САҒЫМБАЙ, 

«Жерге орналастыру» оқу тобының кураторы, г.ғ.к.