ҚазҰУ-да «Azamat» жобасы аясында сыбайлас жемқорлықтың алдын алуға бағытталған кездесу өтті

Әл-Фараби атындағы Қазақ ұлттық университетінің Механика-математика факультетінің Қызыл залында «Azamat» жобасы аясында студенттердің құқықтық сауаттылығын арттыруға және сыбайлас жемқорлықтың алдын алуға бағытталған ақпараттық-түсіндіру кездесуі өтті.

Іс-шара Алматы қаласы Жастар саясаты басқармасының қолдауымен, Қазақстан Республикасы Мемлекеттік қызмет істері агенттігінің Алматы қаласы бойынша Департаментімен бірлесіп ұйымдастырылды.

Кездесудің негізгі мақсаты – студенттердің құқықтық сауаттылығын арттыру, сыбайлас жемқорлыққа қарсы мәдениетті қалыптастыру, заң талаптарын сақтау мен жеке жауапкершіліктің маңызын түсіндіру, сондай-ақ жастардың қоғамдағы азаматтық ұстанымын нығайту.

Іс-шара барысында студенттерге сыбайлас жемқорлықтың алдын алу тетіктері, құқық бұзушылық белгілерін анықтау, құқықтық жауапкершілік, азаматтардың құқықтары мен міндеттері туралы жан-жақты ақпарат берілді. Сонымен қатар сыбайлас жемқорлық сипатындағы жағдайларға тап болған кезде әрекет ету тәртібі және тиісті мемлекеттік органдарға жүгіну жолдары түсіндірілді.

Кездесу ашық диалог форматында өтіп, студенттер өздерін қызықтырған сұрақтарын қойып, сыбайлас жемқорлықтың алдын алу, құқықтық жауапкершілік және азаматтардың құқықтары мен міндеттеріне қатысты нақты түсіндірмелер алды.

Іс-шара барысында жастар арасында заңға құрметпен қарау, адалдық қағидаттарын ұстану және сыбайлас жемқорлық көріністеріне немқұрайды қарамау мәселелеріне ерекше назар аударылды.

«Azamat» жобасы аясындағы мұндай кездесулер студенттердің құқықтық білімін жетілдіруге, сыбайлас жемқорлыққа қарсы мәдениетін қалыптастыруға және олардың қоғамдық өмірге белсенді әрі жауапты азамат ретінде қатысуына ықпал етеді.

Әл-Фараби атындағы ҚазҰУ-да жастардың құқықтық мәдениетін арттыруға, азаматтық жауапкершілігін нығайтуға және сыбайлас жемқорлыққа қарсы құндылықтарды дәріптеуге бағытталған ақпараттық-түсіндіру жұмыстары жүйелі түрде жалғасуда.