ТДМ-5: «Әйел – қырық шырақты» кітабының авторы, кәсіпкер Сымбат Аралбаевамен кездесу өтті

 «Сұңқар» студенттер мен магистранттар кәсіподағының жанынан құрылған «Sen Sulu» қыздар клубының ұйымдастыруымен 6 ақпан күні елімізге белгілі кәсіпкер, отандық зергерлік брендтің негізін қалаушы, «Әйел – қырық шырақты» мотивациялық кітабының авторы Сымбат Аралбаевамен ерекше кездесу кеші өтті.
Кездесу барысында қатысушылар тек кәсіпкерлік пен кәсіби даму тақырыптарында ғана емес, әйелдің қоғамдағы рөлі, өзін-өзі бағалау, табысқа жету жолдары жайлы да мазмұнды әңгіме өрбітті. Сымбат Аралбаева студент жастарға өз тәжірибесімен бөлісіп, өмірлік сабақтары мен құнды кеңестерін айтты. Ол жетістікке жетудің қыр-сыры, өз-өзіне сенім арту, мақсат қою және оны жүзеге асыру жолдары туралы әсерлі ойларымен бөлісті.
Кеш барысында студенттер кәсіпкерге өздерін қызықтырған сұрақтарын қойып, шабыттандыратын жауаптар алды. Қатысушылар бір-біріне жаңа энергия сыйлап, рухани тұрғыдан да қуаттанды. Бұл кездесу – қыздар қауымына мотивация беріп, олардың өз қабілеттеріне деген сенімін арттыру үшін үлкен мүмкіндік болды.
Сымбат Аралбаеваға арнайы уақыт бөліп, студенттермен кездескені үшін ерекше ризашылығымызды білдіреміз!