САРАПТАМАЛЫҚ СТРАТЕГИЯЛЫҚ СЕССИЯ: БІЛІМ БЕРУ БАҒДАРЛАМАЛАРЫНЫҢ САПАСЫН АРТТЫРУ

2025 жылғы 20 ақпанда Алматы қаласында ҚР Ғылым және жоғары білім министрлігі мен әл-Фараби атындағы Қазақ ұлттық университетінің ұйымдастыруымен «Білім беру бағдарламалары сапасын қамтамасыз ету: академиялық тұрғыдан қарау және инновациялық шешімдер» тақырыбында сараптамалық стратегиялық сессия өтті.
Шараның басты мақсаты – еңбек нарығы мен білім беру саласының үйлесімділігін қамтамасыз ету, білім беру бағдарламаларының сапасын арттыру және олардың тиімділігін бағалауға инновациялық тәсілдерді енгізу. Бұл мақсаттар БҰҰ-ның Тұрақты даму мақсаттарымен (ТДМ), әсіресе №4 «Сапалы білім», №8 «Лайықты жұмыс және экономикалық өсу» және №10 «Теңсіздікті азайту» мақсаттарымен тығыз байланысты.
Сессия аясында келесі өзекті мәселелер қарастырылды:
 - Кадрларды даярлаудағы жетекші университеттердің білім беру бағдарламаларының жобалануы;
 - «Мамандығым – болашағым» алдын ала даярлау жобасы;
 - Инклюзивті білім беру: қазіргі жағдайы мен болашағы;
 - Дуалды оқыту жүйесіндегі мәселелер және оларды шешу жолдары;
 - Жасанды интеллект пен микробіліктіліктің жоғары білімге ықпалы.
Заң факультетінің кеден, қаржы және экологиялық құқық кафедрасының меңгерушісі Г.А. Куаналиева, кафедраның профессор-оқытушылар құрамы да бұл маңызды жиынға белсене қатысып, өз ой-пікірлерін ортаға салды.
Сессия қорытындысы бойынша:
- Білім беру бағдарламаларын еңбек нарығының талаптарына бейімдеу бойынша ұсыныстар әзірленді;
- ЖОО мен жұмыс берушілер арасындағы өзара әрекеттестікті нығайтуға арналған Жол картасы жасалды;
- Инклюзивті білім беру моделін іске асыру бойынша әдістемелік ұсынымдар ұсынылды;
- GenAI технологияларын қолдану арқылы білім беру сапасын арттыру бағыттары айқындалды.
Бұл жиын Қазақстанның жоғары білім жүйесін жетілдіру жолындағы маңызды қадам болды.