ТДМ-4: «Әнім сен едің» атты акустикалық кеш өтті

«Сұңқар» студенттер мен магистранттар кәсіподағының жанынан құрылған «Шабыт» шығармашыл жастар клубының ұйымдастыруымен 6 қараша күні «Әнім сен едің» атты акустикалық кеш өтті.

Қазақ вальсінің королі атанған Шәмші Қалдаяқовтың шығармашылығына арналған «Әнім сен едің» атты әдеби-музыкалық кеш жоғары деңгейде ұйымдастырылды. Кеш барысында композитордың қазақ музыка өнеріндегі орны, оның мәңгі өлмес әндері мен шығармашылық мұрасы туралы айтылды.

Шараның басты бөлігі – композитордың әндерін орындау болды. Өнерлі жастарымыз «Арыс жағасында», «Қайықта», «Кешікпей келем деп ең», «Бақыт құшағында» сынды көпшілікке танымал әндерін нақышына келтіре орындап, көрермендердің ыстық ықыласына бөленді.

Кеш соңында студент-жастар қазақ музыкасының алтын қорына енген Шәмші әндері ешқашан ұмытылмайтынын айтып, осындай рухани шаралардың маңыздылығын атап өтті.