ТДМ-4: «Shabyt: 5 years of magic» атты жоба өтті

 «Сұңқар» студенттер мен магистранттар кәсіподағының жанынан құрылған «Шабыт» шығармашыл жастар клубының 5 жылдығына орай 30 қараша күні «Shabyt: 5 years of magic» атты жоба өтті.

Бұл шара клубтың өткен жылдардағы жетістіктерін саралап, жаңа мүшелермен танысуға мүмкіндік беретін маңызды оқиғаларға толы болды.

Жоба аясында клуб тарихына шолу жасалып, оның шығармашылық бағыттары мен атқарылған жұмыстары туралы баяндалды. «Шабыт» клубы осы уақыт ішінде көптеген талантты жастың басын қосып, олардың шығармашылық әлеуетін ашуға, түрлі жобалар мен мәдени шараларды жүзеге асыруға үлкен үлес қосып келеді. 

Шара барысында клуб қатарына жаңадан қосылған 1-курс студенттерімен танысу рәсімі өтті. Жас таланттар өздерінің шығармашылық қабілеттерін таныстырып, өнерлерін ортаға салды. Олардың қатарында жас ақындар, әншілер мен түрлі өнерпаздар болды. Сонымен қатар кеш барысында қатысушылар шығармашылық қойылымдар тамашалап, түрлі интерактивті ойындар мен қызықты тапсырмалар арқылы бір-бірімен жақынырақ танысты. 

Кеш соңында клуб мүшелері мен келген қонақтар «Шабыт» клубының алдағы жоспарларымен танысып, болашақта атқарылатын жобалар туралы ой бөлісті. «Shabyt: 5 years of magic» мерекелік жобасы жылы әрі шабытқа толы атмосферада өтіп, барлық қатысушыларға ерекше әсер қалдырды.