ТДМ – 1-2: Экономика және Бизнес Жоғары Мектебі «Көмек» қоғамдық қоры жәрмеңке өткіздіFarabi University

ТДМ – 1-2: Экономика және Бизнес Жоғары Мектебі «Көмек» қоғамдық қоры жәрмеңке өткізді

31 қаңтар, 2025

Оқу ордамызда Экономика және Бизнес Жоғары Мектебі «Көмек» қоғамдық қорының еріктілері 31 қаңтар күні «100 отбасыға көмек» атты ауқымды қайырымдылық акциясы аясында игі бастамалардың бірі – қайырымдылық жәрмеңкесін ұйымдастырды.

Бұл шара тек қаражат жинау мақсатында ғана емес, қоғамдағы жанашырлық пен бірлікті нығайту, мұқтаж жандарға қолдау көрсету ниетімен өткізілді.

Жәрмеңке ерекше көңіл күй мен жылылыққа толы болды. Студенттер, оқытушылар және университет ұжымы бұл шараға белсенді қатысып, қолдан жасалған бұйымдарды, дәмді тағамдарын және әртүрлі тауарларын сатылымға шығарды. Әрбір сатып алынған зат – тек қаражат жинаудың амалы ғана емес, адамдар арасындағы мейірімділіктің, қамқорлықтың жарқын көрінісі.

Жәрмеңке нәтижесінде 55 300 теңге көлемінде қаражат жиналды. Бұл қаражат толықтай «100 отбасыға көмек» акциясы аясында көмекке мұқтаж отбасыларға бағытталатын болады.

Бұл бір күндік іс-шара болғанымен, оның әсері ұзаққа созылары анық. Осындай бастамалар адамдарды жақсылық жасауға ынталандырып, мейірімділік пен жанашырлықтың маңыздылығын еске салады. Қайырымдылық – үлкен жүректен туындайтын ізгі амал.

Барлық жанашыр азаматтарға, шараға атсалысқан қатысушыларға, қолдау көрсеткен әрбір жанға шексіз алғысымызды білдіреміз! Жақсылық жасау – үлкен күш. Бірге болсақ, кез келген игі іске қол жеткізе аламыз!