ТДМ – 1-2: Филология факультеті «Көмек» қоғамдық қоры қайырымдылық жәрмеңкесін өткізді

Әл-Фараби атындағы Қазақ ұлттық университетінің Филология факультетінде 5 ақпан күні «Көмек» қоғамдық қорының ұйымдастыруымен «100 отбасыға көмек» жобасы аясында қайырымдылық жәрмеңкесі өтті.

Бұл игі шара тек қаражат жинау үшін ғана емес, қоғамдағы жанашырлық пен мейірімділікті арттыру мақсатында ұйымдастырылды.

Жәрмеңкенің басты мақсаты Алматы қаласындағы тұрмысы төмен 100 отбасыға қаржылай және азық-түлік арқылы көмек көрсету. Бұл бастама тек материалдық қолдау ғана емес, қиын жағдайға тап болған жандарға үміт сыйлауды да көздейді.

Жәрмеңке барысында еріктілер қолдан жасалған түрлі бұйымдар, үйден дайындалған тағамдар мен түрлі тауарларды сатылымға шығарды. Шараға қатысушылар өздері үшін пайдалы әрі әдемі заттар сатып алу арқылы үлкен сауапты іске үлес қосты. Жәрмеңке ерекше жылылық пен бірлік атмосферасында өтті. Қатысушылар бір-бірімен әңгімелесіп, жақсылық жасауға деген ынталарын арттырды. Қайырымдылық тек көмек берумен шектелмейді – ол жүрекке қуаныш, жанға жылулық сыйлайтын ізгі амал.

Бұл жоба – мұқтаж жандарға нақты көмек көрсетумен қатар, қоғамда қайырымдылық мәдениетін қалыптастыруға, жастардың әлеуметтік жауапкершілігін арттыруға ықпал ететін маңызды бастама. Осындай шаралар болашақта да жалғасып, жақсылықтың көпірі боларына сенеміз!

Барлық жанашыр жандарға, ұйымдастырушыларға, қатысушыларға шексіз алғысымызды білдіреміз! Бірге болсақ, кез келген игі іске қол жеткізе аламыз!