ТДМ-16: «Ұлттық қор – балаларға» жобасы бойынша ақпараттық кездесу өтті

Әл-Фараби атындағы Қазақ ұлттық университетінде 12 ақпанында «Отбасы банк» өкілдерінің қатысуымен «Ұлттық қор – балаларға» жобасы бойынша ақпараттық кездесу өтті. Бұл шараға Биология және биотехнология факультетінің 2006-2007 жылы туған студенттері қатысып, өздерін қызықтырған сұрақтарға жауап алды.

«Ұлттық қор – балаларға» жобасы 2024 жылдан бастап енгізіліп, еліміздегі 18 жасқа дейінгі балалар мен жасөспірімдер үшін арнайы жинақ есепшоттарын ашуды көздейді. Жоба аясында Ұлттық қордан жыл сайын белгілі бір мөлшерде қаражат бөлініп, ол балалардың білім алуына, тұрғын үй сатып алуына, медициналық қызметтерге және өзге де маңызды қажеттіліктеріне бағытталмақ.

Кездесу барысында «Отбасы банк» мамандары 2006-2007 жылы туған студенттерге ерекше назар аударды, өйткені олар жақын арада 18 жасқа толып, жинақталған қаражатты оқу ақысына, тұрғын үй алуына немесе өзге де мақсаттарға пайдалану мүмкіндігіне ие болады. Мамандар студенттерге жинақ шоттарын ашу және қаражатты тиімді пайдалану жолдарын түсіндіріп, қатысушылардың сұрақтарына жан-жақты жауап берді.

Студенттер кездесуді жоғары бағалап, өз жинақ қаражаттары мен оны болашақта пайдалану мүмкіндіктері туралы пайдалы ақпарат алғанын атап өтті. Сонымен қатар жинақ шоты жоқ студенттерге жаңа есепшот ашу мүмкіндігі ұсынылып, банк өкілдері оның рәсімдеу тәртібін түсіндірді.

Бұл ақпараттық іс-шара студенттерге қаржылық сауаттылықты арттыруға және мемлекет тарапынан бөлінетін қаражатты тиімді басқаруға көмектесетін маңызды қадам болды.