ТДМ-16: Қаржылық болашақ – бүгіннен! «Отбасы банк» мамандары студенттерге кеңес берді

Әл-Фараби атындағы Қазақ ұлттық университетінде 11 ақпн күні «Отбасы банк» өкілдерінің қатысуымен «Ұлттық қор – балаларға» жобасы бойынша маңызды ақпараттық кездесу ұйымдастырылды. Бұл іс-шараға Филология факультетінде білім алып жүрген 2006-2007 жылы туған студенттер қатысып, жоба аясында қарастырылған мүмкіндіктер туралы толық ақпарат алды.

Кездесу барысында «Отбасы банк» мамандары аталған жоба туралы егжей-тегжейлі түсіндіріп, студенттерді қызықтырған сұрақтарға жауап берді. 2024 жылдан бастап іске асқан «Ұлттық қор – балаларға» бастамасы еліміздегі 18 жасқа дейінгі балалар мен жасөспірімдерге арнайы жинақ шоттарын ашуды көздейді. Бұл жоба аясында Ұлттық қордан жыл сайын белгілі бір мөлшерде қаражат бөлініп, ол балалардың келешектегі маңызды қажеттіліктеріне жұмсалатын болады. Атап айтқанда, бөлінген қаражат білім алуға, тұрғын үй сатып алуға, медициналық қызметтерге және басқа да маңызды қажеттіліктерді қамтамасыз етуге бағытталмақ.

Кездесудің басты аудиториясы ретінде 2006-2007 жылы туған студенттер ерекше назарға алынды. Себебі дәл осы жас аралығындағы жастар жақын арада 18 жасқа толады және олар өздерінің жинақталған қаражатын қажетті бағытта пайдалану мүмкіндігіне ие болады. Осы орайда, «Отбасы банк» мамандары студенттерге жинақ шоттарын ашу тәртібін, оның артықшылықтарын және қаражатты тиімді басқару жолдарын түсіндіріп берді. Сондай-ақ студенттер банк өкілдеріне өздерін толғандырған сұрақтарын қойып, нақты жауаптар алды.

Іс-шараға қатысқан студенттер бұл кездесудің өте пайдалы болғанын атап өтті. Олар өздерінің болашақ қаржылық мүмкіндіктері туралы кеңінен мағлұмат алып, жинақ шотын қалай ашуға болатынын түсінді. Сонымен қатар, әлі жинақ шоты жоқ студенттер үшін жаңа есепшот ашу мүмкіндігі ұсынылып, банк мамандары оның рәсімдеу тәртібін жан-жақты түсіндірді.

Бұл ақпараттық шара студенттерге қаржылық сауаттылықты арттыруға, мемлекеттік қолдаудың мүмкіндіктерін дұрыс пайдалануға және өз болашақтарын жоспарлауға көмектесетін маңызды қадам болды. Мұндай кездесулер жастарға қаржы мәселелерін ерте жастан түсініп, өз қаражаттарын тиімді басқаруға үйрететіні сөзсіз.