ТДМ-16: ҚазҰУ студенттері «Ұлттық қор – балаларға» жобасы бойынша кеңес алды

Әл-Фараби атындағы Қазақ ұлттық университетінде 7 ақпан күні студенттерге арналған маңызды ақпараттық кездесу өтті. Бұл іс-шараға «Отбасы банк» өкілдері арнайы шақырылып, студенттерге «Ұлттық қор – балаларға» жобасы туралы жан-жақты түсіндірді. Кездесуге Философия және саясаттану факультеті факультетінің 2006-2007 жылы туған студенттері қатысып, жоба аясында қарастырылған жаңа қаржылық мүмкіндіктермен танысты. 

Кездесу барысында «Отбасы банк» мамандары 2024 жылдан бастап іске қосылған «Ұлттық қор – балаларға» жобасының негізгі бағыттары туралы толық мәлімет берді. Бұл бастама Қазақстандағы 18 жасқа дейінгі балалар мен жасөспірімдерге арнайы жинақ шоттарын ашуға мүмкіндік береді. Жоба аясында Ұлттық қордан жыл сайын белгілі бір көлемде қаражат бөлініп, ол болашақта балалардың маңызды қажеттіліктеріне жұмсалады. Атап айтқанда, бұл қаражат білім алуға, тұрғын үй сатып алуға, медициналық қызметтерге және басқа да әлеуметтік маңызды қажеттіліктерді қаржыландыруға бағытталады. 

Іс-шара барысында студенттер жоба туралы толық мәлімет алып қана қоймай, өздерінің қаржылық сауаттылығын арттыруға мүмкіндік алды. Олардың көпшілігі бұл жобаның болашақтағы қаржылық тұрақтылық үшін маңызды екенін атап өтті. Кездесуге қатысушылар өздеріне жинақ шотының қажет екенін түсініп, оны қалай ашуға болатыны туралы нақты нұсқаулықтар алды. Ал әлі жинақ шоты жоқ студенттер үшін жаңа есепшот ашу мүмкіндігі ұсынылып, банк өкілдері рәсімдеу тәртібін егжей-тегжейлі түсіндіріп берді. 

Бұл ақпараттық кездесу жастарға қаржы жоспарлау негіздерін түсінуге, мемлекет тарапынан ұсынылған қолдауды тиімді пайдалануға және өз болашақтарына сенімді қадам жасауға көмектесетін маңызды шаралардың бірі болды. Осындай кездесулер қаржылық сауатты арттыруға және жас ұрпақтың болашақ өміріне сенімділікпен қарауына үлкен септігін тигізетіні сөзсіз.