ҚазҰУ жатақханасына заманауи асүй жиһазы орнатылды

Әл-Фараби атындағы Қазақ ұлттық университетінің жоғары оқу орнына дейінгі білім беру факультетіне қарасты жатақхананың екі асханасына  заманауи жиһаз орнатылды. Бұған қоса жаңа үстел мен орындықтар қойылды. 

Сонымен қатар білім алушы жастардың емін-еркін ас дайындаулары үшін жаңадан 4 электронды плита мен 2 тоңазытқыш студенттер игілігіне берілді.  Жаңа асүй жиһазы мен техникалар демеушілердің көмегімен сатып алынып, тарту етілді. 

Ашылу салтанатына оқу ордасы мен факультет басшылығы, оқытушы-профессорлар құрамы мен студент-жастар қатысты. 

Іс-шарада ҚазҰУ-дың Тұрақты әлеуметтік даму жөніндегі Басқарма мүшесі - проректор Сәбит Суатай сөз сөйлеп, асүй жиһазын орнатуға демеушілік жасаған факультет түлектеріне ризашылығын жеткізді. Сондай-ақ бұл студенттердің әлеуметтік жағдайын жақсартуға бағытталған игі қадам екенін атап өтті. 

Жиын барысында демеушілер атынан жоғары оқу орнына дейінгі білім беру факультетінің үздік 10 тыңдаушысына 35 мың теңге көлеміндегі бір реттік  шәкіртақы табысталды. 

Әл-Фараби атындағы ҚазҰУ-дың Баспасөз қызметі