ТДМ-16: ҚазҰУ студенттері «Ұлттық қор – балаларға» жобасы бойынша кеңес алды

Оқу ордамызда 4 ақпан күні «Отбасы банк» өкілдерімен бірлесіп «Ұлттық қор – балаларға» жобасы аясында ақпараттық кездесу өтті. Іс-шараға 2006-2007 жылы туған География және табиғатты пайдалану факультетінің студенттері қатысып, жоба туралы маңызды ақпарат алып, өздерін қызықтырған сұрақтарға жауап алды.

Кездесу барысында «Отбасы банк» мамандары студенттерге «Ұлттық қор – балаларға» жобасын жан-жақты түсіндіріп, оның артықшылықтарын атап өтті. 2024 жылдан бастап жүзеге асырыла бастаған бұл жоба еліміздегі 18 жасқа дейінгі балалар мен жасөспірімдер үшін арнайы жинақ шоттарын ашуды көздейді. Жоба аясында Ұлттық қордан жыл сайын бөлінген қаражат балалардың болашақтағы білім алу, тұрғын үй сатып алу, медициналық қызметтер және басқа да қажеттіліктеріне жұмсалады.

Кездесудің басты қатысушылары ретінде 2006-2007 жылы туған студенттер таңдалды, себебі олар жақын арада 18 жасқа толып, өз жинақтары туралы шешім қабылдайтын болады. Осы орайда, «Отбасы банк» мамандары студенттерге жинақ шотын ашу тәртібін, оның артықшылықтарын және қаражатты тиімді пайдалану жолдарын түсіндірді. Сонымен қатар, студенттер банк өкілдеріне өздерін қызықтырған сұрақтарды қойып, нақты әрі толық жауаптар алды.

Бұл іс-шараға қатысқан студенттер кездесудің өте пайдалы болғанын атап өтіп, өз қаржылық болашақтарын дұрыс жоспарлау үшін қажетті ақпарат алғандарын айтты. Жинақ шотын ашу тәртібі түсіндіріліп, шоты жоқ студенттер үшін жаңа есепшот ашу мүмкіндігі ұсынылды. Банк мамандары оның рәсімдеу жолдарын толық түсіндіріп берді.

Бұл ақпараттық шара студенттерге қаржылық сауаттылықты арттыруға, мемлекеттік қолдауды тиімді пайдалануға және болашақтарына қатысты нақты жоспарлар жасауға мүмкіндік берді. Мұндай кездесулер жастарға қаржы мәселелерін ерте жастан түсініп, өз қаражаттарын дұрыс әрі тиімді басқаруды үйретуге зор ықпал етеді.