ТДМ-16: «Отбасы банк» өкілдері студенттерге қаржылық мүмкіндіктер туралы ақпарат берді

Университетімізде 29 қаңтар күні «Отбасы банк» өкілдерінің қатысуымен «Ұлттық қор – балаларға» жобасы бойынша ақпараттық кездесу өтті. Іс-шараға Халықаралық қатынастар факультетінің 2006-2007 жылы туған студенттері қатысты, олар жоба аясында ұсынылған мүмкіндіктер туралы толық мәлімет алып, сұрақтарына жауап алды.

Кездесу барысында «Отбасы банк» мамандары студенттерге жоба туралы толық ақпарат беріп, олардың сұрақтарына жауап қайтарды. 2024 жылдан бастап жүзеге асырыла бастаған «Ұлттық қор – балаларға» жобасы еліміздегі 18 жасқа дейінгі балалар мен жасөспірімдерге арнайы жинақ шоттарын ашуды көздейді. Ұлттық қордан бөлінетін қаражат жыл сайын балалардың болашақ қажеттіліктеріне жұмсалмақ, бұл қаражат білім алу, тұрғын үй сатып алу, медициналық қызметтер мен басқа да маңызды қажеттіліктерді қамтамасыз етуге бағытталатын болады.

Кездесудің негізгі қатысушылары 2006-2007 жылы туған студенттер болды, себебі олар жақында 18 жасқа толып, жинақталған қаражатты болашақта әртүрлі мақсаттарға пайдалануға мүмкіндік алады. Осыған орай, «Отбасы банк» мамандары студенттерге жинақ шоттарын ашу тәртібі мен артықшылықтарын түсіндіріп, қаражатты дұрыс пайдалану жолдарын көрсетті. Студенттер өздерін қызықтырған сұрақтарды қойып, мамандардан нақты әрі толық жауаптар алды.

Іс-шараға қатысқан студенттер бұл кездесуді өте пайдалы деп бағалап, өздерінің қаржылық болашағын жоспарлау үшін қажетті мәлімет алғандарын айтты. Олар жинақ шотын қалай ашу керектігін түсініп, әлі шот ашпаған студенттер үшін жаңа есепшот ашу мүмкіндігі ұсынылды. Банк мамандары бұл процесстің барлық кезеңдерін толық түсіндірді.

Бұл ақпараттық кездесу студенттерге қаржылық сауаттылықты арттыруға, мемлекеттік қолдауды тиімді пайдалануға және болашақтарын дұрыс жоспарлауға көмектесетін маңызды қадам болды. Мұндай шаралар жастарға қаржы мәселелерін ерте жастан түсініп, өз қаражаттарын тиімді басқаруды үйрететіні сөзсіз.