ТДМ-4: Университетімізде «MuzaLight» акустикалық кеші өтті
Әл-Фараби атындағы Қазақ ұлттық университетінің «Сұңқар» студенттер мен магистранттар кәсіподағының жанынан құрылған «Шабыт» шығармашыл жастар клубының ұйымдастыруымен 27 наурыз күні ерекше форматтағы «MuzaLight» акустикалық кеші өтті. Бұл кеш – өнер мен шабыттың тоғысқан, жанды музыка мен еркін шығармашылықтың мерекесі болды.
Кештің басты мақсаты – жас таланттарға еркін сахна ұсынып, шығармашылық әлеуетін шыңдауға мүмкіндік беру. Бұл кеште өнердің сан қыры тоғысып, қатысушылар музыка арқылы өз эмоциялары мен ойларын жеткізе алды. Әсем әуендер, сырлы саздар мен жүрекке жылы тиетін шығармалар көрермендердің көңілінен шығып, ерекше әсер қалдырды.
Кеш барысында ашық микрофон ұйымдастырылып, кез келген көрермен өз өнерін ортаға сала алды. Кейбірі жанды дауыста ән шырқаса, енді бірі жүрек тебірентерлік өлең оқып, өзгеше қойылымдар көрсетті. Әсіресе, қазақтың дәстүрлі әндерін орындаған жастар мен заманауи жанрларды үйлестірген музыканттар көпшіліктің ықыласына бөленді. Көрермендер әрбір орындаушыны зор қошеметпен қарсы алып, ерекше жылулықпен шығарып салды.
Кештің тағы бір ерекшелігі – сахнаға шыққан әрбір өнерпаздың аудиториямен еркін байланыс орнатып, шығармашылықтың нағыз атмосферасын сезіне алуы болды. Шынайы сезім мен эмоцияға толы қойылымдар, әуезді әуендер, нәзік лирика мен шабытқа толы әңгімелер бұл кештің шырайын аша түсті.
Музыка мен талант тоғысқан бұл ерекше шара тек тыңдаушыларға ғана емес, өнерін ортаға салғысы келген жандарға да шабыт сыйлады. Кеш барысында қатысушылар жаңа достар тауып, ортақ қызығушылықтары бар жандармен жақын танысуға мүмкіндік алды. Осындай шаралар жастардың шығармашылық қабілеттерін дамытып қана қоймай, олардың өздеріне деген сенімін арттырып, өнерге деген құштарлығын одан әрі нығайта түсетіні сөзсіз.
«MuzaLight» – жүрекке жылу, көңілге шуақ сыйлаған ерекше мәдени кеш ретінде есте қалды. Бұл кеш тек бір күндік шара ғана емес, көптеген жас өнерпаздардың жаңа белестерге қадам басуына ықпал еткен шабыт көзі болды.
