«Геодезия және картография» мамандығының студенттері тұрақты даму мақсаттарын жүзеге асыруға белсенді атсалысып, өз үлестерін қосуда. Соның ішінде №15 – Құрлық экожүйелерін қорғау бағыты студенттердің жауапкершілігін арттырудағы маңызды міндеттердің бірі.
Құстар табиғаттың тепе-теңдігін сақтауда маңызды рөл атқарады. Олар зиянды жәндіктермен қоректеніп, өсімдіктердің көбеюіне ықпал етеді. Әрбір құстың өзіне тән үні, түр-түсі мен мінезі бар. Бұл табиғатқа әртүрлілік пен сұлулық сыйлайды. Табиғаттың әсем көріністері мен құстардың әуезді үні адамды ерекше сезімдерге бөлейді.
Осы орайда, география және табиғатты пайдалану факультеті Картография және геоинформатика кафедрасының 2-курс студенттері «Құстарды қорғау – табиғатты қорғау» ұстанымымен ҚР Тұңғыш Президенті саябағына барып, құстардың ұялары мен астауларына жем толтырып, қоректендіріп қайтты.
Аталған іс-шараның мақсаты – адамзаттың қоршаған ортаға деген жанашырлығын ояту. Бұл шара студенттерге табиғатты аялауға, қоршаған ортамен үйлесімді өмір сүрудің маңыздылығын түсінуге көмек берді. Білім алушылар құстарды қоректендіріп қана қоймай, олардың экожүйедегі рөлін де талқылады. Мұндай іс-шаралар жастардың табиғатты қорғау жауапкершілігін арттырып, қоршаған ортаға деген сүйіспеншілігін нығайтады.
Құстар – біздің қоршаған ортаның маңызды бөлігі. Оларды қорғау – әрбір адамның міндеті. Егер біз табиғатымызды аялауды үйренсек, болашақ ұрпаққа да бай экожүйе мен әсем табиғатты аманат ете аламыз. Құстарды қорғауға бірге үлес қосайық!
Зейнеп СӘРСЕМБЕКОВА,
Салтанат ТУМАЖАНОВА,
Картография және геоинформатика кафедрасының аға оқытушылары
Басқа жаңалықтар
