ТДМ №4, 8, 9, 17: Болашақ мамандық пен инновациялар туралы диалог: ҚазҰУ түлегі, Paidax компаниясының бас директоры (СЕО) Бексұлтанқожа Әнуаровпен кездесу

Тұрақты даму мақсаттары (ТДМ) және ҚазҰУ түлектерін қолдау аясында университетте «Болашақ мамандық пен инновациялар» тақырыбында диалог өтті. Іс-шараға біздің түлегіміз, Paidax финтех-компаниясының бас директоры (CEO) Бексұлтанқожа Әнуаров қатысып, студенттер мен оқытушыларға заманауи қаржы платформасының жұмысымен тікелей танысуға мүмкіндік берді. Іс-шара сұрақ-жауап форматында ұйымдастырылып, аудиториямен интерактивті байланыс орнатылды.

Кездесуден бұрын арнайы видео-презентация көрсетіліп, онда Бексұлтанқожа Әнуаровтың өмірбаяны, Paidax компаниясының миссиясы мен негізгі қызметтері таныстырылды. Видео аяқталған соң модератор қонақты ресми түрде аудиторияға таныстырып, ол өз сөзінде ҚазҰУ-дың Механика-математика факультетінің «Математикалық және компьютерлік модельдеу» мамандығы бойынша студенті болып бастаған жолын, қазіргі таңда инновациялық финтех-компанияның CEO-сы ретінде жеткен жетістіктерін баяндады. Математикалық модельдеу мен алгоритмдік инвестицияларға деген қызығушылығы цифрлық инновациялар, этикалық инвестициялар және халал-аналитика элементтері бар платформаны жасауға әкелді, бұл қаржы нарығын қолжетімді әрі инклюзивті етеді.

Paidax компаниясының негізгі көрсеткіштері:

• 600 000 АҚШ долларынан астам инвестиция тартылды;
• алғашқы айларда 12 000+ қолданушы тіркелді;
• компанияның қызметі АХҚО лицензиясымен расталған, бұл оның легитимділігі мен сенімділігін көрсетеді.

Платформа студенттер мен бастаушы инвесторларға тәжірибелік білім алуға, қаржылық сауаттылықты арттыруға мүмкіндік береді, ал тәжірибелі инвесторлар нарықтағы ең төмен комиссиялармен тиімді шешім қабылдай алады. Бексұлтанқожа сондай-ақ компанияның халықаралық нарықтарға шығу жоспарын — Өзбекстан, Қырғызстан, Әзербайжан мемлекеттерімен де бөлісіп, жергілікті брокерлер мен банктермен серіктестік жасағанын атап өтті, бұл түлектің халықаралық деңгейдегі ықпалын көрсетеді.

Іс-шара:

• студенттерге практикалық тәжірибе мен менторлық қолдауды беруге ықпал етті (ТДМ 4 – Сапалы білім);
• еңбек нарығында жетілу, карьера құру және кәсіпкерлік дағдыларды дамытуға жағдай жасады (ТДМ 8 – Тиімді жұмыс және экономикалық өсім);
• финтех-инновациялар, стартаптар, цифрлық платформалар және токенделген активтермен танысуға мүмкіндік берді (ТДМ 9 – Индустрия, инновациялар және инфрақұрылым);
• университет пен бизнес сектор арасындағы шынайы экономикалық серіктестікті нығайтты (ТДМ 17 – Мақсаттарға арналған серіктестік).

Осы кездесудің арқасында студенттер қаржы нарығындағы заманауи трендтерді түсініп, кәсіпкерлік жолы туралы сұрақтар қойып, инновациялық инвестициялық мүмкіндіктерді зерттеп, ҚазҰУ-дың табысты түлегі арқылы әлемді жақсартуға үлес қосатын нақты кейсті бақылауға мүмкіндік алды. Іс-шара білімді трансфертеу мен жастар арасында инновациялық кәсіпкерлікті дамыту маңыздылығын көрсетті.