«Дала мен қала»

6 сентября, 2011

Білім нәрі

Университеттер қаншалықты білімді, толыққанды бәсекеге қабілетті мамандар дайындайтын болса, соған байланысты қоғамымыз ой-санасы да жетіле түспек. Ал студенттердің білім алып, ғылыми жұмыстарын жетілдіруге кітапхананың, оқырман залдарының білім нәрімен сусындауға келген жастарға тигізер үлесі өте зор.

Жуырда, әл-Фараби атындағы Қазақ ұлттық университеті басшыларының қолдауымен ҚазҰУ колледжінің студенттеріне арналған ғылыми кітапханасының оқырман залы мен абонементі салтанатты түрде ашылды. Ашылу рәсіміне ҚР Кәсіподақ Федерациясы жастар кеңесінің және Алматы қалалық «Парасат» кәсіподағының төрағасы Данат Жанатаев, ҚазҰУ «Парасат» кәсіподағының төрағасы Талғат Мекебаев, ҚазҰУ Ғылыми кітапхана директоры Гүлжан Мұсағалиева, ректор аппараты жетекшісінң орынбасары Әбдіқаһар Сейітжанов және колледж директоры Талғат Молдаханов қатысты. ҚазҰУ-дың ғылыми кітапханасының директоры Гүлжан Мұсағалиева осы колледж студенттеріне арналған кітапхананы ашуға өте үлкен үлес қосып отыр. Абонементте 5000 дана кітап және бірнеше журнал-газет, жаңа оқу-әдістемелік жинақтар бар. Арнайы оқырмандарға арналған 160 отыратын орыны бар зал беріліп отыр. Кітапхана барлық сала бойынша әдебиеттермен қамтамасыз етілген. Оқырмандар арнайы электрондық картотека мен каталогтарды қолдану мүмкіндігіне ие. Жаңа оқу жылынан бастап әл-Фараби атындағы Қазақ ұлттық университетінде толық жаңғырту үрдістері жүріп жатыр. Биылғы оқу жылына ҚазҰУ әлемдік деңгейдегі зерттеу университетінің үлгісін жасап жаңғыртуды жүзеге асыруда.

Еңлік АҚЖІГІТ