БӨЛШЕК САУДА САЛАСЫНДАҒЫ ҚҰҚЫҚТЫҚ РЕТТЕУДІҢ ӨЗЕКТІ МӘСЕЛЕЛЕРІ ТАЛҚЫЛАНДЫ

2024 жылғы 23 желтоқсанда әл-Фараби атындағы Қазақ ұлттық университетінің кеден, қаржы және экологиялық құқық кафедрасында ТДМ 17 (Тұрақты даму мақсаттары) іске асыру шеңберінде "Ритейл саласындағы заңгердің атқаратын қызметі" тақырыбында ғылыми семинар өтті. Семинар ритейл (бөлшек сауда) саласындағы құқықтық реттеудің өзекті мәселелерін талқылау үшін ұйымдастырылды.
Іс-шараға деканның оқу, әдістемелік және тәрбие жұмысы жөніндегі орынбасары С.Э. Асанова, кеден, қаржы және экологиялық құқық кафедрасының меңгерушісі Г.А. Қуаналиева, кафедраның профессорлық-оқытушылық құрамы, сондай-ақ тақырыпқа жоғары қызығушылық танытқан студенттер қатысты.
Шақырылған қонақ "Скиф Трейд" ЖШС (SMALL супермаркеттер желісі) заң қызметі бастығының орынбасары, комплаенс-бақылаушысы Айжан Бабаева баяндама жасады. Ол бөлшек саудадағы құқықтық реттеудің негізгі аспектілері мен ерекшеліктерін атап өтті. Сөз сөйлеу барысында А. Бабаева заңгерлер мен комплаенс-мамандардың алдында қандай сын-қатерлер туындайтынын және құқықтық практикада қандай жаңа үрдістер байқалатынын егжей-тегжейлі түсіндірді.
Баяндамада көтерілген мәселелер студенттер мен оқытушылардың қызығушылығын тудырды. Қатысушылар заңнамалық өзгерістердің нюанстарына, сондай-ақ ірі сауда желісіндегі заң қызметтерінің ерекшеліктеріне қатысты сұрақтар қойды. Семинар жоғары деңгейде өтті және студенттер, оқытушылар және практик-мамандар арасында белсенді білім алмасуға ықпал етті.