ТДМ-4: «Студенттердің оқуға деген мотивациясын арттыру жолдары» тақырыбында тренинг өтті

Әл-Фараби атындағы ҚазҰУ-дың психологиялық қолдау қызметі мен «Инклюзивті орта» ғылыми-тәжірибелік орталығы ТДМ-4: «Сапалы білім беру» аясында 6 ақпан күні  № 13-шы жатақханада тұратын студенттерге  арналған «Студенттердің оқуға деген мотивациясын арттыру жолдары» атты семинар-тренинг өткізді.Тренинг қатысушылар арасында жағымды қарым-қатынас орнату мақсатында «Танысу» жаттығуымен басталды.  

Психологиялық тренингтің мақсаты - қатысушы студенттердің оқу кезінде қажет ететін кәсіби дағдыларды игеру, өзін-өзі реттеу және өзін-өзі бақылау дағдыларын үйрету, өзіне және өз күшіне деген сенімділікті арттыру. Сонымен қатар, студенттердің ішкі үрейі мен қорқынышын жеңуге, ашық болуға бағытталған әртүрлі жаттығулар орындалып, кездесу көптеген пайдалы әрі қызықты эмоцияларға толы болды.

Тренинг барысында студенттер өз эмоцияларымен жұмыс істей отырып, қиын жағдайларда тыныштық сақтауға және дұрыс шешім қабылдауға үйренді. Жаттығулар барысында олардың өзара сенімділігі артты, бір-бірімен жақсы қарым-қатынас орнатып, топта жұмыс істеу дағдыларын жетілдірді. Қатысушылар өздерінің күшті және әлсіз тұстарын талдап, жеке даму бағыттарын анықтай алды.

Бұл тренинг тек психологиялық тұрғыдан қолдау көрсету ғана емес, сондай-ақ студенттердің өзін-өзі жетілдіруге деген ынтасын арттырып, олардың әлеуметтік және кәсіби дағдыларын жақсартуға көмектесті. Семинардың соңында барлық қатысушылар тренингтен алған білімдерін өмірде қолдануға дайын екендіктерін білдіріп, кездесудің әсерлі әрі пайдалы болғанын атап өтті.