ТДМ-4: Студенттер театрда «Жусан иісі» қойылымын тамашалады

Оқу ордамыздың Филология факультетінің «Шетел филологиясы және аударма» кафедрасының 2-курс студенттері 6 ақпан күні  Ғ.Мүсірепов атындағы Қазақ мемлекеттік академиялық балалар мен жасөспірімдер театрында жазушы Сайн Мұратбековтің шығармасын арқау еткен «Жусан иісі» қойылымын тамашалады.

«Жусан иісі» шығармасы – халықтың соғыстан кейінгі тұрмысы мен қазақ ауылының, замандастарының тыныс-тіршілігін шынайы сомдаған шығарма. Сюжетінде Аян атты жасөспірім баланың өмірінің белгілі бір кезеңінде болған оқиғалар суреттеледі. Әкесі соғыста, анасы жоқ, жалғыз әжесі қайтыс болып, соғыстан ағасын күткен Аянның ішкі болмысы, тайған тобығының азабынан да ауыр жан жарасы баяндалады.

Бұл қойылым өз көрермендеріне ерекше әсер қалдырды. Ол студенттердің қойылымнан соң өздерінің алған әсерлерімен бөлісіп, қойылым туралы ойларын ортаға салғанына анық көрінді. Студенттердің қойылым туралы пікірлері қойылымның әлеуметтік мәнін тереңірек түсінуге және ондағы көтерілген тақырыптарға сыни тұрғыдан ойлауды дамытуға ықпал етті.