ТДМ-4: Студенттер «Әпке» қойылымын тамашалады

Ғ. Мүсірепов атындағы Жасөспірімдер театрында философия және саясаттану факультетінің студенттері танымал жазушы, драматург, Қазақстан Республикасы Мемлекеттік сыйлығының иегері Дулат Исабековтің «Әпке» драмалық қойылымын тамашалады. 1977 жылы жазылған бұл драма екі бөлімнен тұратын сахналық қойылымға арналған шығарма болып табылады.

Қойылымның басты кейіпкері – Қамажай, өмірдің қиыншылықтарын жеңіп, бауырларына жан-тәнімен қамқорлық көрсететін жан. Ол өз өмірін тек бауырларына арнаған, олардың болашағына алаңдап, жеке өмірі туралы ойлауды ұмытып кеткен. Қабенге деген сезімін ашып, оның ұсынысына жауап берген сәті – «Қабен, ол... ол қиын сияқты, бауырларымды қиып тастай алмаймын, олар әлі мен үшін бала, өздігінен өмір сүретініне күмәнім бар...» деп бас тартуы – оның бауырларына деген жанашырлығын айқындайды.

Драма шиеленісті оқиғадан басталып одан әрі өрбиді. Алғашқы оқиға Темірбектің өзінің құрбысын, нақтырақ айтқанда болашақ жарын үйіне қонақ ретінде әкелуден басталады. сол кезде Нәзиләнің бір ауыз сөзінен үйде ұрыс шығып Гауһардың ренжіп кетуімен аяқталады. Жалпы шығармада Қамажай өте сыпайы, мейірімді адам жан-жақтан келген қыспақтардан соңында ауруға шалдығады. Қабденнің Қамажайға жасаған ұсынысы тосыннан болғандықтан, ол ойланбай жауап береді. Бірақ жүрегінде өте үлкен сезімді жасыра алмайды. Кәмила өзінің баласын алдырып тастағандықан, Қамажай оны шапалақпен тартып жібереді. Оған ашуланған Темірбек үйінен кетіп қалады. Қамажайдың шарасыздығы сонша келінінен кешірім сұрауға дейін барады... Бірақ соңынан Темірбек бұл ісіне өкініп, кешірім сұрап келеді. «Әпке» драмасы шынайы оқиғалар желісіне құрылған, кейіпкерлердің жан тебірентерлік сезімдері мен шынайы бейнелері арқылы көрерменге ерекше әсер қалдырды.

Қойылым соңында студенттер естелік суретке түсіп, алған әсерлерімен бөлісіп, аталмыш мәдени шарадан үлкен рухани әсер алғандарын жеткізді.