ТДМ – 1-2: Механика-математика факультеті «Көмек» қоғамдық қоры қайырымдылық жәрмеңкесін өткізді

Әл-Фараби атындағы Қазақ ұлттық университетінің механика-математика факультетінде 30 қаңтар күні игі дәстүрге айналған қайырымдылық жәрмеңкесі өтті. Ізгілік пен мейірімділікке негізделген бұл шараны механика-математика факультетінің «Көмек» қоғамдық қоры ұйымдастырды.

Жәрмеңке факультет ғимаратында таңғы уақыттан кешке дейін жалғасты. Оған оқытушылар, студенттер мен университеттің өзге де ізгі ниетті азаматтары белсене қатысты. Шараның басты мақсаты – жиналған қаражатты әлеуметтік жағдайы төмен және мүмкіндігі шектеулі отбасыларға қаржылай немесе материалдық көмек ретінде ұсыну.

Жәрмеңкеде түрлі қолөнер бұйымдары, студенттердің өз қолымен пісірген тәтті-дәмділері, сондай-ақ кітаптар, картиналар мен кәдесыйлар сатылымға қойылды. Әрбір бұйымда жүрек жылуы, шынайы жанашырлық пен қамқорлық сезімі сезілді. Адамдардың бір-біріне деген мейірімі мен жанашырлығы бұл күні ерекше көрініс тапты.

Жәрмеңке барысында студенттер тек сауда жасап қана қоймай, бір-бірімен жылы әңгіме-дүкен құрып, ортақ мақсат жолында жұмыла әрекет етті. Әсіресе, осындай игі бастамаларға алғаш рет қатысып отырған жастардың бойынан жауапкершілік пен жанашырлықтың көрініс тапқаны қуантты.

Шара соңында жиналған қаражат арнайы есепке алынып, көмекке мұқтаж жандарға бағытталатыны туралы ұйымдастырушылар мәлімдеді.

Бұл жәрмеңке – қайырымдылықтың, бірлік пен жанашырлықтың жарқын үлгісі. Ол көпшілікке жақсылық жасаудың қаншалықты маңызды екенін тағы бір мәрте дәлелдеді. Осындай игі бастамалар алдағы уақытта да жалғасын тауып, мейірімділік пен қайырымдылықтың нұры қоғамымызда одан әрі жарқырай беретініне сенім мол!