ТДМ-4 «Тиімді коммуникация дағдылары» атты семинар-тренинг

Әл-Фараби атындағы ҚазҰУ-дың психологиялық қолдау қызметі мен «Инклюзивті орта» ғылыми-тәжірибелік орталығы ТДМ-4: «Сапалы білім беру» аясында 14 наурыз күні № 6-шы жатақханада тұратын студенттерге  арналған «Тиімді коммуникация дағдылары» атты  семинар-тренинг өткізді.Тренинг қатысушылар арасында жағымды қарым-қатынас орнату мақсатында «Танысу» жаттығуымен басталды.  

Тренингтің мақсаты: Қатысушылардың тиімді коммуникация дағдыларын дамыту, бұл олардың кәсіби және жеке өмірінде өзара әрекеттесуді жақсартуға мүмкіндік береді. Тренинг тыңдауды, ойларды анық және нақты білдіруді жетілдіруге, сондай-ақ ақпаратты қабылдау мен оған жауап беруде контексті ескере отырып жұмыс істеуге бағытталған.

Тренингтің міндеттері:

• Қатысушыларды тиімді коммуникацияның негізгі принциптерімен таныстыру.
• Белсенді тыңдау және эмпатия дағдыларын дамыту.
• Қарым-қатынастың невербальды элементтерін (қимылдар, мимика, интонация) қолдануды үйрету.
• Коммуникациядағы кедергілерді, мысалы, түсінбеушілік пен үнемі жаңылыстыруды жеңуге үйрету.
• Қақтығыстарды конструктивті және кәсіби түрде шешу дағдыларын дамыту.
• Қоғам алдында сөз сөйлеу және келіссөздер жүргізу барысында өзін-өзі сенімді сезінуге көмектесу.

Тренингтің әдістері:

• Практикалық жаттығулар
• Рөлдік ойындар
• Топтық талқылаулар
• Кері байланыс және жеке кеңестер

Тренингтің нәтижесі: Тренингтен кейін қатысушылар:

• Әріптестерімен, серіктестерімен және клиенттерімен тиімді қарым-қатынас жасай алатын болады.
• Белсенді тыңдау дағдыларын және өз ойларын анық және түсінікті түрде білдіру дағдыларын дамытады.
• Коммуникациялық кедергілерді жеңу әдістерін қолданады.
• Эмоцияларын басқара алады және тиімді коммуникация арқылы қақтығыстарды болдырмайды.
• Қоғам алдында сөз сөйлеу немесе келіссөздер жүргізу жағдайларында сенімді сезінеді.

Бұл тренинг тек психологиялық қолдау ғана емес, сонымен қатар студенттердің өзін-өзі жетілдіруге деген мотивациясын арттырып, олардың әлеуметтік және кәсіби дағдыларын жақсартуға ықпал етті. Семинар соңында барлық қатысушылар алған білімдерін өмірде қолдануға дайын екендерін білдіріп, кездесудің әсерлі және пайдалы болғанын атап өтті.