ТДМ-4: ҚазҰУ-да «Қазақстанның жастары – жасампаз» патриоттық жиыны өтті

Әл-Фараби атындағы Қазақ ұлттық университетінде Қазақстан Президенті Қасым-Жомарт Тоқаевтың тапсырмасына сәйкес, жастарға көрсетілетін мемлекеттік қолдау шараларын түсіндіру мақсатында «Қазақстанның жастары – жасампаз» патриоттық жиыны өтті.

Еркін форматта ұйымдастырылған жиынға жастар ұйымдарының көшбасшылары, шетелдік студенттер, жас ғалымдар және қоғам өміріне белсене атсалысып жүрген еріктілер қатысты.

ҚазҰУ Басқарма Төрағасы – Ректоры Жансейіт Түймебаев өз сөзінде студенттік ғылымның дамуына ерекше мән беріп, мемлекет пен университет тарапынан жастарға әрдайым қолдау көрсетілетінін атап өтті. Сондай-ақ, оқу орнының беделі білімге ұмтылған ізденімпаз жастар арқылы қалыптасатынын айтып, технология дамыған кезеңде ғылыми жаңалықтар мен инновациялық жобаларға ден қоюдың маңыздылығына тоқталды.

«Мемлекет басшысы Қасым-Жомарт Тоқаев: «Біз жұрттан көш ілгері жүретін ел боламыз. Үйренетін де, үйрететін де ұлт боламыз. Жастар барлық өзгерістің бастауында тұрады. Бұл өзгерістер Әділетті Қазақстанды құру, «Заң мен тәртіпті» қамтамасыз ету тұжырымдамасына негізделген», – деп атап өткен болатын. Біздің ҚазҰУ жастары да жасампаздық танытып, тың идеялар мен игі істердің бастамашысы боларына сенемін», – деді университет басшысы.

Кездесу барысында белсенді жастар мен шетелдік студенттер өз ойларымен бөлісіп, пікірлерін ортаға салды.

Президент стипендиясының иегері, «Жастар рухы» жастар қанаты ұйымының төрағасы Әйгерім Есімхан Астана қаласында өткен «Жаңа адамдар» жастар форумына қатысқаны туралы айтып, қоғамдағы өзекті мәселелерге тоқталды:

«Форумда вандализм, рұқсат етілмеген жерге қоқыс төгу, кәмелетке толмағандарға ішімдік сату, есірткі тарату секілді мәселелер көтерілді. «Заң мен тәртіп» үстемдігін қамтамасыз етудің маңыздылығы талқыланды. Сонымен қатар, «Таза Қазақстан» экологиялық акциясының идеологиялық мәні түсіндірілді. Бүгінгі жиында осы мәселелерді бірге шешуге шақырамын», – деді ол.

Шетелдік студент Насболла Файзи ҚазҰУ-да білім алып жатқанына ризашылығын білдіріп:

«Әл-Фараби атындағы ҚазҰУ-да оқу – мен үшін үлкен мәртебе. Мұнда өз білімімді жетілдіріп, болашақта білікті дәрігер ретінде халыққа адал қызмет еткім келеді», – деді.

Айта кетейік, бүгінде ҚазҰУ-да 54 мемлекеттен келген 4 мыңға жуық студент білім алуда.

Жиын соңында ректор шетелдік студенттердің университет өміріне белсенді араласуы қажеттігін атап, жас ғалымдардың стартап-жобалары мен креативті бастамаларын дамытуға қолдау көрсетілетінін жеткізді.

Сонымен қатар, Жансейіт Түймебаев қоғам өміріне белсене араласып, игі бастамаларға ұйытқы болған бірқатар студенттерге Алғыс хат және университет значогын табыстап, олардың еңбегін ерекше атап өтті.