ТДМ-16: Қаржылық болашақ – бүгіннен басталады: «Отбасы банк» студенттерге қаржылық кеңестер берді

Университетімізде 31 қаңтар күні «Отбасы банк» өкілдерімен бірге «Ұлттық қор – балаларға» жобасы бойынша ақпараттық кездесу өтті. Бұл іс-шараға Заң факультетінің 2006-2007 жылы туған студенттері қатысып, жоба жайында толық ақпарат алып, өздерін қызықтырған сұрақтарға жауап алды.

2024 жылдан бастап іске қосылған «Ұлттық қор – балаларға» жобасы еліміздегі 18 жасқа дейінгі балалар мен жасөспірімдер үшін арнайы жинақ есепшоттарын ашуды мақсат етеді. Жоба аясында Ұлттық қордан жыл сайын бөлінген қаржы балалардың білім алуына, тұрғын үй сатып алуға, медициналық көмекке және басқа да қажеттіліктерге жұмсалатын болады.

Кездесу барысында «Отбасы банк» мамандары 2006-2007 жылы туған студенттерге ерекше көңіл бөліп, олар жақында 18 жасқа толып, өз жинақтарын әртүрлі қажеттіліктеріне, оның ішінде білім алу мен тұрғын үй мәселелерін шешуге пайдалана алатынын түсіндірді. Студенттерге жинақ шоттарын ашу мен қаражатты тиімді басқару тәсілдері туралы ақпарат беріліп, олардың сұрақтарына толық жауаптар ұсынылды.

Студенттер бұл іс-шараны өте пайдалы деп бағалап, өз жинақтары мен оның болашақта қандай мақсаттарға пайдаланылатынын түсінгендерін айтты. Сонымен қатар, жинақ шоты жоқ студенттер үшін жаңа есепшот ашу мүмкіндігі ұсынылып, банк өкілдері оның рәсімдеу тәртібін егжей-тегжейлі түсіндірді.

Бұл шара студенттерге қаржылық сауаттылықты арттыруға, мемлекеттік қолдауды тиімді пайдалануға және болашақ қаржылық жоспарларды жасауға септігін тигізетін маңызды қадам болды.