ТДМ-16: Банк мамандары студенттерге мемлекеттік жинақ бағдарламасының мүмкіндіктерін түсіндірді

Білім ордамызда 13 ақпан күні студенттер үшін маңызды ақпараттық кездесу өтті. Бұл шараға «Отбасы банк» өкілдері қатысып, студенттерге «Ұлттық қор – балаларға» жобасының мән-жайы мен мүмкіндіктері туралы егжей-тегжейлі мәлімет берді. Кездесуге Медицина және денсаулық сақтау факультетінің 2006-2007 жылы туған студенттері қатысты, олар жоба арқылы ұсынылған жаңа қаржылық мүмкіндіктермен танысты.

Кездесу барысында «Отбасы банк» мамандары 2024 жылдан бастап іске қосылған «Ұлттық қор – балаларға» жобасының негізгі мақсаттарын түсіндірді. Жоба еліміздегі 18 жасқа дейінгі балалар мен жасөспірімдерге арнайы жинақ шоттарын ашуды қарастырады. Әр жыл сайын Ұлттық қордан бөлінетін қаражат балалардың білім алуына, тұрғын үй сатып алуға, медициналық қызметтер мен басқа да маңызды қажеттіліктерді қамтамасыз етуге жұмсалатын болады.

Іс-шараға қатысқан студенттер жоба туралы толық ақпарат алып қана қоймай, қаржылық сауаттылықтарын арттыруға да мүмкіндік алды. Олардың көпшілігі бұл жобаның болашақтағы қаржылық тұрақтылық үшін өте маңызды екенін атап өтті. Кездесуде студенттер жинақ шотын қалай ашуға болатынын түсініп, жаңа есепшот ашу мүмкіндігі ұсынылған студенттерге банк өкілдері оның рәсімделу тәртібін толық түсіндірді.

Бұл ақпараттық кездесу студенттерге қаржы жоспарлау, мемлекет тарапынан көрсетілетін қолдауды тиімді пайдалану, сондай-ақ болашақтарына жауапкершілікпен қарайтын сенімді қадам жасауға мүмкіндік берді. Мұндай шаралар жастардың қаржылық сауаттылығын арттыруға және олардың болашақ өміріне сеніммен қарауына ықпал етеді.