ТДМ-16: Болашаққа сенімді қадам: «Отбасы банк» қызметкерлерімен ақпараттық кездесу өтті

Университетімізде 14 ақпан күні студенттер үшін маңызды ақпараттық кездесу өтті. Шараға «Отбасы банк» өкілдері қатысып, студенттерге «Ұлттық қор – балаларға» жобасының артықшылықтары мен мүмкіндіктері туралы толық түсінік берді. Кездесуге Механика-математика факультетінің 2006-2007 жылы туған студенттері қатысып, жоба аясында ұсынылған қаржылық мүмкіндіктерді зерделеді.

Кездесу барысында «Отбасы банк» мамандары 2024 жылдан бастап жүзеге асырылып жатқан «Ұлттық қор – балаларға» жобасының негізгі мақсаттары мен бағыттарын түсіндірді. Бұл бастама еліміздегі 18 жасқа дейінгі балалар мен жасөспірімдер үшін арнайы жинақ шоттарын ашуды көздейді. Жоба аясында Ұлттық қордан жыл сайын белгілі бір сомада қаражат бөлініп, ол балалардың білім алу, тұрғын үй сатып алу, медициналық қызметтер мен басқа да маңызды қажеттіліктерін қаржыландыруға бағытталатын болады.

Іс-шара барысында студенттер тек жоба туралы ақпарат алып қана қоймай, қаржылық сауаттылықтарын арттыруға да мүмкіндік алды. Студенттердің көпшілігі бұл жобаның болашақтағы қаржылық тұрақтылық үшін маңыздылығын атап өтіп, жинақ шотын қалай ашу керектігін түсінді. Сондай-ақ, әлі жинақ шоты ашылмаған студенттер үшін жаңа есепшот ашу мүмкіндігі ұсынылып, банк өкілдері оның рәсімделу тәртібін толығымен түсіндірді.

Бұл ақпараттық кездесу студенттерге қаржы жоспарлау дағдыларын қалыптастыруға, мемлекет тарапынан көрсетілетін қолдауды тиімді пайдалануға және болашаққа сенімді қадамдар жасауға көмектесті. Мұндай шаралар жастардың қаржылық сауаттылығын арттыруға және олардың болашақ өміріне сеніммен қарауына ықпал етеді.