ТДМ-16: Қаржылық жоспарлау мен жинақ шоттары: «Отбасы банк» қызметкерлері ақпараттық кездесу өткізді

Оқу ордамызда 17 ақпан күні студенттерге арналған маңызды ақпараттық кездесу өтті. Шараға «Отбасы банк» өкілдері қатысып, «Ұлттық қор – балаларға» жобасы туралы толық ақпарат берді. Кездесуге Экономика жәнe бизнес жоғары мектебінің 2006-2007 жылы туған студенттері қатысты, олар бұл жоба арқылы қаржылық мүмкіндіктерді тиімді пайдалану жолдарын білді.

Кездесу барысында «Отбасы банк» мамандары 2024 жылдан бастап жүзеге асырыла бастаған «Ұлттық қор – балаларға» жобасының негізгі бағыттары мен мақсаттарын түсіндірді. Бұл жоба 18 жасқа дейінгі балалар мен жасөспірімдер үшін арнайы жинақ шоттарын ашуды көздейді. Ұлттық қордан бөлінетін қаражат әр жыл сайын балалардың білім алуына, тұрғын үй сатып алуына, медициналық қызметтер мен басқа да маңызды қажеттіліктерін қамтамасыз етуге жұмсалады.

Шараға қатысқан студенттер жоба туралы толық мәлімет алып, қаржылық сауаттылықтарын арттыру мүмкіндігіне ие болды. Көптеген студенттер бұл жобаның болашақ қаржылық тұрақтылық үшін маңыздылығын түсініп, жинақ шотын қалай ашу керектігін білді. Сондай-ақ, әлі шот ашпаған студенттерге жаңа есепшот ашу мүмкіндігі ұсынылып, банк өкілдері бұл процеске қатысты барлық сұрақтарға жауап берді.

Бұл іс-шара студенттерге қаржылық жоспарлау, мемлекет тарапынан бөлінетін қаражатты тиімді пайдалану және болашаққа сенімді қадамдар жасау мүмкіндігін берді. Мұндай кездесулер жастардың қаржылық сауаттылығын арттырып, болашақ өміріне сеніммен қарауға ықпал ететіні сөзсіз.