ТДМ-4: «Ең үздік эдвайзер – 2025» байқауының ІІ кезеңі өтті

Университетте 12 наурыз күні «Сұңқар» студенттер мен магистранттар кәсіподағының ұйымдастыруымен дәстүрлі «Ең үздік эдвайзер – 2025» байқауының ІІ кезеңі өтті. Бұл кезең екі бөлімнен – «Brain Ring» интеллектуалды сайысы мен «Start up» ғылыми жоба байқауынан тұрды. 

Байқаудың алғашқы кезеңінде эдвайзерлер өздерін бейнеролик арқылы таныстырып, кәсіби және шығармашылық қабілеттерін көрсетті. Нәтижесінде алты үздік эдвайзер келесі кезеңге жолдама алды: 

1.Рысқали Толғанай – Биология және биотехнология факультетінің эдвайзері; 

2.Әлімбай Алмас – География және табиғатты пайдалану факультетінің эдвайзері; 

3. Сәрсенбай Жанат – Филология факультетінің эдвайзері; 

4.Тлетай Шолпан – Ақпараттық технологиялар факультетінің эдвайзері; 

5.Жайнақ Айдар – Заң факультетінің эдвайзері; 

6.Байтукаева Дана – Халықаралық қатынастар факультетінің эдвайзері. 

Екінші кезеңде эдвайзерлер екі түрлі сыннан өтті. 

«Brain Ring» интеллектуалды сайысында қатысушылар өздерінің білім деңгейін, логикалық ойлау қабілетін және шапшаңдығын көрсетті. Түрлі қойылған сұрақтарға дұрыс әрі тез жауап беру арқылы олар өздерінің жан-жақты білімдарлығын дәлелдеді. 

Ал «Start up» сайысында эдвайзерлер ғылыми жобаларын ұсынып, өз саласындағы өзекті мәселелерді шешудің тың тәсілдерін таныстырды. Бұл кезеңде олардың ғылыми ізденісі, жобаның жаңашылдығы мен жүзеге асу мүмкіндігі сарапқа салынды. Әрбір қатысушы өз саласының маңыздылығын көрсетіп, болашаққа бағытталған идеяларын қорғады. 

«Ең үздік эдвайзер – 2025» байқауы жоғары оқу орнының эдвайзерлерінің кәсіби шеберлігін жетілдіруге, олардың студенттермен қарым-қатынасын нығайтуға және білім мен ғылымға қосқан үлесін дәріптеуге бағытталған. Байқау қатысушылары үшін бұл – өздерінің педагогикалық, ұйымдастырушылық және көшбасшылық қабілеттерін көрсетуге берілген бірегей мүмкіндік.