ТДМ-4: Оқу ордамызда кітап оқу сайысы өтті

Әл-Фараби атындағы Қазақ ұлттық университеті «Сұңқар» студенттермен магистранттар кәсіподағы «FARAB» оқырмандар клубы мен университет кітапханасы бірлесіп 19 наурыз күні «Кітап оқу сайысын» ұйымдастырды.

Бұл сайыс оқырмандардың білімін шыңдап, шығармашылық қабілеттерін дамытуға, кітапқа деген сүйіспеншілігін арттыруға бағытталды. Қатысушылардың қызығушылығын ояту мақсатында сайыс үш кезең бойынша ұйымдастырылды.

Бірінші кезең – онлайн тест. Қатысушылар өз білімдерін тексеріп, шығарманың мазмұнын қаншалықты меңгергендерін көрсетті. Бұл кезеңде кітап оқуға деген ұқыптылық пен зейін бағаланды.

Екінші кезең – жылдамдыққа арналған куиз. Қатысушылар логикалық сұрақтарға жылдам жауап беріп, ұпай жинауға тырысты. Бұл кезең жылдам ойлау мен шешім қабылдау қабілеттерін дамытты.

Үшінші кезең – «Автор орнында болсам...» шығармашылық кезеңі. Қатысушылар шығарманы өз ойларымен жалғастырып, ерекше эссе жазу арқылы қиялын көрсетті. Бұл кезең шығармашылық қабілетті, қиялды, әдеби талғамды дамытуға бағытталды.

Кітап оқу сайысының басты мақсаты – жастардың кітапқа деген қызығушылығын арттырып, әдебиеттің рухани байлығын ұғындыру. Оқырмандардың белсенділігі мен ынтасы сайыстың маңыздылығын дәлелдеді.

Жеңімпаздар қаржылай сыйлықтармен және алғыс хаттармен марапатталды. Сонымен қатар, барлық қатысушыларға алғыс айтылып, кітап оқудың маңызы жайында сөз қозғалды.

Кітап – білімнің қайнар көзі, рухани байлықтың негізі. Осындай шаралар арқылы оқырмандардың кітапқа деген махаббаты артып, әдебиетке деген қызығушылығы арта түсетініне сенеміз.