Сауд Арабиясы Корольдігі университеттерімен байланыс
Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев Астанадағы Сауд Арабиясы Корольдігі елшісінің орынбасары Салех Фахд Альбедахпен кездесті.
Әңгімелесу барысында тараптар екі елдің жоғары оқу орындары арасындағы ынтымақтастықты одан әрі нығайту және кеңейту мәселелерін талқылады.
Жансейіт Түймебаев құрметті қонақты қарсы ала отырып, Қазақстан мен Сауд Арабиясы Корольдігі арасындағы дипломатиялық қатынас орнағаннан бері түрлі бағытта серіктестік тұрақты дамып келе жатқанын атап өтті. Сонымен қатар ректор ғылым және жоғары білім беру саласында Сауд Арабиясының ЖОО-ларымен ынтымақтастықты жандандыруға ниет білдірді.
«Әл-Фараби атындағы ҚазҰУ-да Арабтану орталығы жұмыс істейді. Болашақта аталған орталықпен бірлесіп түрлі конференциялар мен симпозиумдар өткізуді ұсынамын. Сондай-ақ Сауд Арабиясы Корольдігіндегі университет профессорларын көшбасшылық дәріс оқуға шақырамын», – деді Жансейіт Түймебаев.
Салех Фахд Альбедах өз кезегінде ҚазҰУ-да жүргізіліп жатқан жұмыстарды жоғары бағалап, екі ел арасындағы серіктестік одан әрі дамитынына сенім білдірді. «Қазақстанмен кез келген сала бойынша әріптестік байланысты нығайтуға ниеттіміз. Соның ішінде алдағы уақытта ғылым, инновация, технология бағытындағы ынтымақтастық артады деп сенеміз. Бұған қос елдің мүмкіншілігі жетеді», – деді елші орынбасары.
Кездесу қорытындысы бойынша тараптар барлық маңызды бағыттар бойынша серіктестікті дамытуға уағдаласты.
Әл-Фараби атындағы ҚазҰУ-дың Баспасөз қызметі
