ҚазҰУ Бейжің университетімен ынтымақтастықты нығайтады

Қытай Халық Республикасымен стратегиялық серіктестікті дамыту аясында Әл-Фараби атындағы ҚазҰУ-дың Басқарма Төрағасының орынбасары – бірінші проректор Еркін Дүйсенов Бейжің университеті делегациясымен кездесті. Шара барысында тараптар білім, ғылым және мәдениет саласындағы өзара тиімді ынтымақтастықтың перспективаларын талқылады.

Бейжің университетінің өкілдерін қарсы алған ҚазҰУ басшылығы бірлескен жұмысқа қызығушылық білдіргені үшін оларға алғыс айтты. Бірінші проректор ҚазҰУ еліміздің жетекші ғылыми университеті екенін және QS WUR 2025 рейтингі бойынша әлемдегі 200 үздік университеттің қатарына кіретінін атап өтті. Университетте 16 факультет, 8 ғылыми-зерттеу институты, 140 зертхана және 29 ғылыми орталық жұмыс істейді.

ҚазҰУ Қытайдың 65 ЖОО және ұйымдарымен ынтымақтастықты белсенді түрде дамытуда. Оның ішінде Пекин университеті, Цинхуа және басқа да танымал университеттермен серіктестік байланыс орнатқан. Барлық келісімдер аясында белсенді ғылыми және академиялық қызмет жүзеге асырылуда. 2024-25 оқу жылында ҚазҰУ оқытушылары, докторанттары мен магистранттары Қытай университеттерінде тәжірибеден өтті. Қазіргі уақытта ҚазҰУ-да Қытайдан 1440 студент білім алуда.

Ынтымақтастықтың маңызды бағыттарының бірі – медицина саласындағы зерттеулерді дамыту. Мәселен, 2019 жылы ҚазҰУ-да Дәрілік өсімдіктерді ғылыми-зерттеу орталығы құрылды. Оның базасында 2022 жылы өсімдік шикізатынан инновациялық өнімдерді өндіру бойынша шағын өндіріс іске қосылды. Орталық дәрілік өсімдіктер өндірісінің толық циклын дамыту, өсіруден – өнімді нарыққа шығаруға дейін айналысады.

ҚазҰУ-дың медицина және денсаулық сақтау факультеті, оның құрамына Қоғамдық денсаулық сақтау жоғары мектебі, Медицина жоғары мектебі және «Инновациялық денсаулық сақтау» ғылыми орталығы кіреді. Ол бүгінде еліміздің жетекші медициналық факультеттерінің бірі саналады. Факультетте өзінің клиникалық базасы бар. 22 елден 1000 шетелдікті қоса алғанда, 2000-нан астам студентті оқытады және Erasmus+ бағдарламасы бойынша ғылыми жобаларды белсенді түрде жүзеге асырады.

Өз кезегінде Қытай инженерлік академиясының академигі Чжан Цян және Пекин университетінің Дәрілік әкімшілік бойынша халықаралық зерттеу орталығының директоры Ши Лувэнь ынтымақтастықты одан әрі нығайтуға үміт білдіріп, бірлескен жұмыс бойынша бірнеше ұсыныс айтты. Тараптар өзара пікір алмасып, дәстүрлі қытай медицинасындағы бірлескен білім беру бағдарламаларын әзірлеу, қытай және батыс медицинасын интеграциялау, бірлескен зерттеу орталығын құру және басқа да мәселелерді талқылады. Жүздесу соңында қытай делегациясы ҚазҰУ кампусын аралады.

 Әл-Фараби атындағы ҚазҰУ-дың Баспасөз қызметі