АҚШ КОНГРЕСІ ҚАЗҰУ ӘЛЕУЕТІН ЖОҒАРЫ БАҒАЛАДЫ

Әл-Фараби атындағы Қазақ ұлттық университетіне АҚШ Конгресінің Өкілдер палатасы аппараты қызметкерлерінен құралған делегация (STAFFDEL) ресми сапармен келді.

Кездесу барысында құрметті қонақтарға арнап кампус-тур ұйымдастырылды. Делегация мүшелері Farabi hub инновациялық орталығының қызметімен, жетекші ғылыми-зерттеу орталықтарының жұмысымен, сондай-ақ Farabi supercomputer орталығының мүмкіндіктерімен танысты. Университеттің заманауи инфрақұрылымы мен жоғары технологиялық зертханаларына делегация мүшелері зор қызығушылық танытты.

ҚазҰУ Басқарма Төрағасының орынбасары – бірінші проректор Еркін Дүйсенов делегацияны жылы қабылдап, университеттің шетелдік жоғары оқу орындары және ғылыми ұйымдарымен жүйелі әрі тұрақты әріптестік байланыс орнатып келе жатқанын атап өтті. Сондай-ақ ол ҚазҰУ-дың ғылыми-инновациялық жетістіктері мен халықаралық жобаларға белсенді қатысуы жөнінде жан-жақты ақпарат берді.

Сапар аясында делегация құрамындағы Мэтт Хатсон – конгресмен Энди Харристің аппарат басшысы, Джесси Фон Стайн – конгресмен Кори Миллстің аппарат басшысының орынбасары, Семаж Мартин-Редд – конгресмен Трент Келлидің заңнама мәселелері жөніндегі директоры, Ариэль Дорси – Өкілдер палатасы Бюджет және салық комитетінің Сауда жөніндегі қосалқы комитетінің аға кәсіби қызметкері, Алек Даман – конгресмен Билл Хайзенганың заңнама мәселелері жөніндегі аға кеңесшісі, Анна Макдональд – конгресвумен Анна Камлагер-Давтың заңнама мәселелері жөніндегі аға кеңесшісі, университеттің белсенді студенттерімен еркін форматтағы кездесуге қатысып, пікір алмасты.

Кездесу барысында екіжақты ынтымақтастық, жастар саясаты, білім беру саласындағы жаңа бағыттар және халықаралық академиялық ұтқырлық мәселелері талқыланды.

Академиялық мәселелер жөніндегі проректор Алина Галеева ҚазҰУ-дың оқу үрдісі туралы кеңінен мәлімет беріп, қосдипломдық бағдарламалар арқылы университет түлектерінің жаһандық еңбек нарығында жоғары сұранысқа ие, жан-жақты бәсекеге қабілетті маман болып қалыптасатынын атап өтті.

Делегация мүшелері университет ұжымына мазмұнды кездесу ұйымдастырғаны үшін алғыс білдіріп, ҚазҰУ-дың ғылыми-инновациялық әлеуетіне жоғары баға берді.

Әл-Фараби атындағы ҚазҰУ-дың Баспасөз қызметі