Қазақстандағы студент жастарға мемлекеттік қолдауды арттыру

Филология факультеті, шетел филологиясы және аударма ісі кафедрасының ұйымдастыруымен «Қазақстандағы студент жастарға мемлекеттік қолдауды арттыру» атты кураторлық сағат қаңтардың 28 күні, 306 аудиторияда сағат 17:00-де 7М02312 – Шетел филологиясы (батыс тілдері) мамандығының 1 курс магистранттарына өткізілді. Кураторлық сағат мемлекет басшысының тапсырмасын іске асыру мақсатында әзірленген «Келешек» бірыңғай ерікті жинақтау жүйесін таныстырумен басталды. Бұл мемлекеттік қолдау шарасы Қазақстандағы балаларға 5 жастан 18 жасқа дейін елде және шетелде білім алу үшін қаражат жинақтауға мүмкіндік береді. Жүйеге қатысу үшін ата-аналар білім беру жинақтау жүйесіне кіретін банктерде немесе сақтандыру компанияларында шот ашуы қажет. Шотқа 5 жасқа толған балалар үшін 60 АЕК (2025 жылы 235 920 теңге), ал жетім балаларға 120 АЕК (471 840 теңге) бастапқы капитал ретінде аударылады. Сонымен қатар, жыл сайын 5-7% мөлшерінде мемлекеттік сыйақы және инвестициялық табыс есептеледі. Жүйенің басты талабы – ата-аналар жыл сайын кемінде 12 АЕК көлемінде міндетті жарна төлеуі тиіс. Жинақтар Қазақстанның депозиттерге кепілдік беру қорымен сақтандырылса, сақтандыру төлемдері Сақтандыру төлемдеріне кепілдік беру қоры арқылы қорғалады.Егер бала мемлекеттік грантқа ие болса, жиналған қаражатты жоғары оқу орнынан кейінгі білім алуға пайдалануға болады. Сондай-ақ, жинақтарды тұрғын үй жағдайын жақсарту мақсатында немесе қажет болған жағдайда басқа тұлғаларға беруге рұқсат етіледі. Кураторлық сағат келесі ақпараттар көзімен жалғасты:

Мемлекеттің ЖОО студенттері үшін стипендияларды ұлғайту бойынша жоспары:

• 2025 жылы ЖОО және колледж студенттері үшін стипендия 2 есе, магистранттар мен докторанттар үшін 1,75 есе артады.
• 2025 жылғы 1 қыркүйектен бастап бакалавриат студенттеріне стипендия 52 372 теңгеге дейін, ал педагогикалық және медициналық бағыттардағы білім алушыларға – 84 000 теңгеге дейін, магистранттарға – 117 098 теңгеге, докторанттарға – 262 500 теңгеге дейін өседі.
• Интернатурада оқитын студенттерге стипендия – 94 862 теңге, ал резидентурада – 134 664 теңге көлемінде төленетін болады.
• Емтихан сессиясын «өте жақсы» тапсырған жағдайда студенттердің жоғары стипендия алу мүмкіндігі сақталады.
• Студенттердің жекелеген санаттары үшін стипендияға үстемеақы белгіленді. Оларға мыналар құқылы:
• Жоғары немесе кәсіптік, орта білімнен кейінгі, жоғары оқу орнынан кейінгі білім алатын көру және есту қабілеті бұзылған адамдарға бакалавриат студенттеріне – 94 651 теңге, магистранттарға – 204 921 теңге, докторанттарға – 459 375 теңге үстемеақы белгіленді.
• Жаралану, контузия, ауру салдарынан мүгедектігі бар немесе мертіккен адамдарға бакалавриат студенттеріне – 78 558 теңге, магистранттарға – 175 647 теңге, интерндерге – 142 293 теңге үстемеақы белгіленді.

Сонымен қатар ата-анасының қамқорлығынсыз қалған немесе қорғаншылықтағы (қамқоршылықтағы) жетім балалар қатарындағы адамдарға стипендия 30%-ға көтерілетіндігі, яғни бакалавриат студенттеріне – 68 083 теңге, магистранттарға – 152 227 теңге, интерндерге – 123 320 теңге үстемеақы белгіленетіні хабарланды.

Қураторлық сағатта студенттерге арналған жатақханалар жаңалығы да жарияланды. Атап айтқанада, 2024 жылдың қорытындысы бойынша елімізде 11 096 орын пайдалануға берілгендігі және 2029 жылға дейін жатақханаларда жыл сайын 10 мың орынды пайдалануға беру жоспары таныстырылды.

Шарада студент жастардың  білімдерін нығайту үшін қалай өздеріне көмек көрсете алатыны туралы айтылып, жол көрсетілді.

Шараға тікелей жауапты: 1 курс докторанттары, Кәсіпхан Шолпан және Оразтаева Жадыра

Эдвайзер: Искакова Гульназ Нурдильдаевна