ТДМ-4: «Өзіңді тану және дамыту: Сенімділікке қол жеткізу жолдары» тақырыбында тренинг өтті

Әл-Фараби атындағы ҚазҰУ-дың психологиялық қолдау қызметі мен «Инклюзивті орта» ғылыми-тәжірибелік орталығы ТДМ-4: «Сапалы білім беру» аясында 27 қаңтар күні № 9-жатақханада тұратын студенттерге арналған «Өзін-өзі сенімділікті арттыру жолдары» атты семинар-тренинг өткізді.

Тренинг «Танысу» жаттығуымен басталды, оның мақсаты – қатысушылар арасында жағымды қарым-қатынас орнату болды. Іс-шара барысында студенттер өз әлеуетін ашуға, коммуникативтік дағдыларын дамытуға және ұжымда сенім қалыптастыруға бағытталған интерактивті тапсырмаларды орындады.

Психологиялық тренингтің мақсаты – студенттерді кәсіби дағдыларға үйрету, өзін-өзі реттеу мен өзін-өзі бақылау қабілеттерін дамыту, сондай-ақ өзіне деген сенімділікті арттыру. Сонымен қатар, тренингке қатысушылар ішкі қорқыныш пен мазасыздықты жеңу техникасын үйренді, өз ойлары мен сезімдерін дұрыс жеткізу дағдыларын меңгерді, эмоционалды интеллектін дамытты.

Тренингте рөлдік ойындар, топтық пікірталастар және өзін-өзі таныстыруға бағытталған арнайы жаттығулар өткізілді. Психологтар мен жаттықтырушылар студенттерге өзін-өзі бағалауды жақсарту, психологиялық кедергілерді жою және ішкі үйлесімділікке қол жеткізу бойынша практикалық ұсыныстар берді.

Кездесудің қорытынды кезеңінде қатысушылар тренинг барысында алған тәжірибелерімен бөлісті, оның пайдасын атап өтті және алған дағдыларын әрі қарай дамытқысы келетінін білдірді. Кездесу жылы, достық атмосферада өтіп, көптеген жағымды эмоциялар сыйлады.