Бүгін әл-Фараби атындағы Қазақ ұлттық университетінде педагогика және білім беру менеджменті кафедрасының 85 жылдығына арналған «ЗАМАНАУИ БІЛІМ МЕН ҒЫЛЫМ: ТАРИХЫ, БОЛАШАҒЫ» атты халықаралық ғылыми конференция болды. Аталған ғылыми шараға еліміздің және шетелдің ғалымдары қатысты. Еліміздің педагогика тарихында болған оқиғалар осы кафедраның қалыптасу мен дамуы барысында маман дайындау, инновациялық және ғылыми-зерттеу, әлеуметтік-саяси өмірімен тығыз байланысты. Кафедраның қалыптасу жолындағы деректерге сүйенсек, алғаш 1937 жылы педагогика кабинеті болып ашылған және меңгерушісі С. Қожахметов болды (1910-1945 жж). Педагогика жеке кафедра ретінде 1940 жылы 12 қаңтарда құрылған. Кафедра алғашында «Педагогика», одан кейін «Жалпы және этникалық педагогика» кафедрасы болып аталса, бүгінгі күні «Педагогика және білім беру менеджменті» кафедрасы болып өзгертіліп, педагогикалық бейіндегі мамандарды даярлайтын философия және саясаттану факультетінің іргелі кафедрасы болып табылады.
Бүгінде кафедраның профессор-оқытушы құрамы университеттің барлық факультеттеріндегі студенттер арасындағы әлеуметтік-мәдени, ағартушылық іс-шараларды өткізуге бағытталған оқу-тәрбие жұмыстарымен тығыз байланысты. Елжанды, рухани-адамгершілікті тұлға тәрбиелеу, кафедраның ағартушылық-тәрбие жұмысының негізгі міндеттері болып табылады.
Кафедра республикамыздағы және шетелдердегі білім беру ұйымдарымен және орталықтарымен тығыз байланыста. Атап айтқанда, Массачусетс университеті (АҚШ), Гент университеті (Бельгия), Бургас университеті (Болгария), Пеш университеті (Венгрия) және еліміздің беделді ғылыми-зерттеу орталықтары Ы. Алтынсарин атындағы білім беру академиясы, Қазақстанның педагогикалық ғылымдар академиясы, Ұлттық құндылықтар академиясы, «Өрлеу» біліктілікті арттыру ұлттық орталығы мен ғылыми-шығармашылық байланыс жасайды.
Кафедра жұмыс жасап келе жатқан уақыттан бері білім беру мен қоғамның басқа салаларында жоғары кәсіби деңгейдегі мамандар даярлап, бүгінде біздің түлектеріміз елімізде және шетелдерде жұмыс жасап жүр. Кафедра еңбек нарығында сұранысқа ие ғылыми-педагогикалық кадрлар мен жоғары білікті мамандар даярлауда білім беру мен ғылыми және қоғамдық орталық болып табылады.
Дүйсенбаев Абай Қабақбайұлы
Әл-Фараби атындағы Қазақ ұлттық университеті, п.ғ.к., доцент
