ҚазҰУ-дың әйел ғалымдары марапатталды

Әл-Фараби атындағы ҚазҰУ-да 11 ақпанда аталып өткен Ғылымдағы  әйелдер мен қыздардың халықаралық күніне орай салтанатты жиын өтіп, университетте табысты еңбек етіп жүрген әйел ғалымдар марапатталды.

Жиында ҚазҰУ-дың Басқарма Төрағасы – Ректор Жансейіт Түймебаев отандық ғылымды дамытуға айрықша үлес қосып отырған барша нәзік жандыларды мерекемен құттықтады.

«Мемлекет басшысы Қасым-Жомарт Тоқаев өз сөзінде: «Қазақстанда әйелдерге барлық жағдай жасалған. Кез келген істе әйелдердің кәсіби біліктілігі мен жауапкершілігі айқын аңғарылады. Әйелдер қауымының жасампаздық қасиеті мен күш-қуаты жаңа Қазақстанның ілгерілеуіне септігін тигізеді деп сенемін», – деп атап өткен болатын. Әл-Фараби атындағы Қазақ ұлттық университетінде  әйел ғалымдардың алатын орны ерекше. Білім ордасында жыл өткен сайын оқу-білімге, зерттеуге ден қойған қыз-келіншектер көбейіп келеді. Кәсіби шеберліктеріңіз, қайсар мінездеріңіз, еңбекқорлықтарыңыз ғылымның сан қырлы саласын дамытуға үлкен үлес қосады», – деді ЖОО басшысы.

Қазіргі таңда оқу ордасында ғылыми зерттеулермен айналысып жүрген 2475 оқытушы-профессордың 1772-сі – әйел азаматтар. Білім ордасындағы жалпы ғалымдар санының 71 пайызы  нәзік жандылардың үлесінде.

Университеттегі 647 ғылым докторының 383-і,  697 ғылым кандидатының 498-і, 588 PhD  доктордың 391-і  және 1 ҚР ҰҒА академигі, Қазақстан Жоғары мектебі Ұлттық ғылым академиясының 3 корреспондент-мүшесі – әйел ғалымдар.

Шара барысында ғылымды дамытуға қосқан үлесі үшін бір топ ғалым әйелге Қазақстан Республикасының Президенті Қасым-Жомарт Тоқаевтың алғыс хаты мен «Шапағат» медалі табысталды. Сонымен қатар жетістікке жеткен ғалым әйелдер Қазақстандағы тіл саласына арналған ведомстволық марапат – «Ахмет Байтұрсынұлы» төсбелгісі, ҚазҰУ ректорының алғыс хаты және ҚазҰУ-дың «Ерен еңбегі үшін», «Фараби» алтын медальдарымен марапатталды. 

Әл-Фараби атындағы ҚазҰУ-дың Баспасөз қызметі