«Ұлттық тәрбие – ұлт болашағы» тақырыбындағы тәрбиелік іс-шараның есебі
2025 жылдың 19 ақпаны күні Шығыстану факультетінің 1-курс докторанттары «Тұрақты даму мақсаттары» бағдарламасының аясында ұйымдастырылған «Ұлттық тәрбие - ұлт болашағы» тақырыбындағы тәрбиелік іс-шарасын өткізді.
Тәрбиелік іс-шараның ұйымдастырушылары: Әл Фараби атындағы ҚазҰУ, Шығыстану факультетінің 1-курс PhD докторанттары, «Жалпы және қолданбалы психология» кафедрасының профессоры, психология ғылымдарының докторы С.Қ. Бердибаева мен «Педагогика және білім беру менеджменті» кафедрасының доценті А.М. Құдайбергенова.
Тәрбиелік іс-шараға «Қытайтану» кафедрасының меңгерушісі – PhD, доцент Е.А. Керимбаев және Шығыстану факультетінің докторанттары мен магистранттары қатысты.
Тәрбиелік іс-шараның негізгі мақсаты - ұлттық тәрбие мәселелерін талқылау, оның ұлттың болашағына тигізетін әсерін түсіндіру және ұлттық құндылықтарды жаңғырту қажеттілігін талдау.
Тәрбиелік іс-шара барысында ұлттық тәрбие мәселесі кеңінен талқыланды. Ұлттық тәрбие дегеніміз – бұл ұлттың дәстүрлері мен мәдениетіне негізделген, жас ұрпаққа берілетін білім мен тәрбие жүйесі. Ұлттық тәрбие адамның жеке тұлғасын қалыптастырып қана қоймай, сонымен қатар ұлттың жалпы рухани және мәдени құндылықтарын сақтап, дамытуға бағытталады.
Осы мәселені толығырақ ашу мақсатында, Қарақұлова Ләйланың және Қалиолла Гүлнардың «Ұлттық құндылықтарды жастарға насихаттау жолдары» атты баяндамалары тыңдалды. Баяндамада ұлттық тәрбие түсінігі, оның жастарды рухани жағынан дамытудағы рөлі, ұлттың тарихи мәдениетінің сақталуына әсері талқыланды. Әсіресе, қазақ халқының салт-дәстүрлері мен әдет-ғұрыптарының, ана тілінің жас ұрпаққа берілуі туралы айтылды. Сонымен қатар, жастардың ұлттық рухын қалыптастыру, оларды өз мәдениетіне деген сүйіспеншілігін арттыру, сондай-ақ әлеуметтік ортада азаматтық позициясын нығайту мәселелері талқыланды.
Семинардың соңғы бөлімінде ұлттық құндылықтарды жаңғырту және оларды заман талабына сай бейімдеу жолдары жөнінде пікірталас болды. Қазіргі заманның технологиялық және әлеуметтік өзгерістеріне сәйкес, ұлттық дәстүрлер мен құндылықтарды сақтау жолдарын іздеу қажеттілігі айтылды.
Сөз кезегі «Қытайтану» кафедрасының меңгерушісі – PhD, доцент Е.А. Керімбаевқа және «Жалпы және қолданбалы психология» кафедрасының профессоры, психология ғылымдарының докторы - Света Қыдырбекқызына берілді.
Іс-шараны қорытындылап, қатысушыларға тәттілер таратылды. Бірге фотосурет жасап, алғысымызды айтып, тәрбиелік іс шараны тәмамдадық.
