ТДМ-4: Студенттерге арналған «Сенің өмірің – сенің таңдауың» атты психологиялық тренинг Әл-Фараби атындағы кітапханада өтті

3 қазан күні Әл-Фараби атындағы кітапханада жоғары оқу орындарындағы білім алушылардың психологиялық әл-ауқатын нығайту және девиантты мінез-құлықтың алдын алу жұмысы аясында студенттерге арналған «Сенің өмірің – сенің таңдауың» тақырыбында психологиялық тренинг өтті.

Тренингті Орталық Азия және Қазақстан психоанализ қауымдастығының психоаналитигі, профессор, жоғары санатты психиатр-дәрігер, психотерапевт Ассимова Тамара Аубакирқызы және психолог-аналитик Нурпеисова Салтанат Юсуфқызы жүргізді.

Іс-шара студенттердің саналы таңдау жасау, жеке жауапкершілік пен эмоционалдық тұрақтылық дағдыларын дамытуға бағытталды. Интерактивті жаттығулар мен пікірталастар барысында қатысушылар ішкі күйзелістің алдын алу әдістерімен танысып, күйзеліс белгілерін ерте тану және өзін-өзі қолдаудың тиімді тәсілдерін үйренді.

Спикерлер өзін-өзі анықтау, өмірлік мақсаттарды құру және өз-өзіне сенімділікті арттыру мәселелеріне ерекше назар аударды. Сондай-ақ, жеке дамуды, оқу үдерісін және эмоционалдық тепе-теңдікті үйлестіру жолдары талқыланды.

Қатысушылардың айтуынша, тренинг жылы және сенімді атмосферада өтті. Ол студенттерге жаңа білім алып қана қоймай, өмір мен оқу қиындықтарына деген көзқарастарын қайта қарауға мүмкіндік берді. Мұндай кездесулер университетте салауатты психологиялық ахуал қалыптастыруға және жастардың өзін-өзі тану мәдениетін арттыруға ықпал етеді.