ТДМ №4: «Психологиялық денсаулық — студенттің кәсіби қалыптасуының негізі» тақырыбында семинар-тренинг

2025 жылдың 10 қазанында Әл-Фараби атындағы Қазақ ұлттық университетінің Заң факультетінде «Инклюзивті орта» ғылыми-практикалық орталығы мен Психологиялық қолдау қызметінің ұйымдастыруымен Тұрақты даму мақсаттары (ТДМ) - 4: «Сапалы білім беру» бағыты аясында «Психологиялық денсаулық — студенттің кәсіби қалыптасуының негізі» тақырыбында семинар-тренинг өткізілді.

Семинар-тренингтің мақсаты – студенттердің психологиялық денсаулығын нығайту, эмоционалдық тұрақтылық дағдыларын дамыту, сондай-ақ болашақ маман ретінде менталдық саулықтың маңыздылығын түсінуге көмектесу болды. Іс-шараға заң факультетінің белсенді студенттері қатысты. Олар психогигиена негіздерімен және ішкі тепе-теңдікті сақтаудың әдістерімен танысты.

Семинар барысында келесі негізгі тақырыптар қарастырылды:

• Психологиялық денсаулық ұғымы және оның адам өміріндегі рөлі;

• Психоэмоционалдық жағдай мен оқу мотивациясының өзара байланысы;

• Эмоциялық күйзелудің (выгорание) негізгі белгілері және оның алдын алу жолдары;

• Өзін-өзі реттеу, релаксация және стресстің алдын алу әдістері;

• Психогигиена мен менталдық саулықты студенттік және кәсіби өмірде сақтау маңыздылығы.

Семинардың практикалық бөлігінде интерактивті психологиялық жаттығулар, релаксациялық техникалар және топтық пікірталастар өткізілді. Бұл жаттығулар студенттердің өзін-өзі тануына, эмоцияларын түсінуге, күйзеліс тудыратын факторларды анықтауға және олармен тиімді күресу жолдарын табуға ықпал етті. Студенттер психологиялық қиындықтарды қалай еңсергені жөнінде жеке тәжірибелерімен бөлісті және ішкі жай-күйлерін қалай күтетіні туралы айтты.

Қатысушылар пайдалы ақпарат, өз-өзіне күтім жасауға деген мотивация және менталдық саулықты қолдау үшін жаңа құралдар алды. Семинар жылы әрі қолайлы атмосферада өтті, бұл ашық қарым-қатынасқа және қатысушылар арасындағы түсіністікті арттыруға септігін тигізді.

Соңында қатысушылар ұйымдастырушыларға алғыс білдіріп, мұндай шаралардың студенттердің психологиялық денсаулығын сақтау мен тұлғалық дамуы үшін үнемі өткізіліп тұруының маңыздылығын атап өтті.