Мәди ЖАҚСЫЛЫҚ: Мобилография саласы ертеректен қызықтырды
Кішкентайынан алдына мақсат қойып, сол жолда ізденіп, тәжірибе жинап, қазір айтарлықтай табысқа жеткен жастарымыздың бірі – Әл-Фараби атындағы Қазақ ұлттық университеті журналистика факультетінің 2-курс студенті Жақсылық Мәдимен әңгімелестік.
– Мәди, мектеп кезінде өзіңізді қай саланың маманы ретінде көре бастадыңыз? Қандай қызығушылықтарыңыз болды?
– 10-сынып оқып жүргенімде видео түсіруге қызыға бастадым. Мектепте өтетін түрлі байқау, іс-шараларды түсіріп, қоғамдық орталарда жиі бой көрсетіп жүрдім. Бүгінде Әл-Фараби атындағы ҚазҰУ-дың ресми мобилографымын. Менің жасаған видео түсірілімдерім Farabiuniversity парақшасына шығып тұрады.
– Мобилографияға қалай келдіңіз?
– Бірінші курс оқып жүргенімде жатақханада тұрып, студенттік қызықты шақтарымды өткердім. Мені осы мобилография арқылы табыс табу, кәсіби маман ретінде жетілу жолы қызықтырды. Еліміздегі ірі кәсіпкерлік орталықтардың тіркелген бас штабында жарты жылға жуық қызмет атқардым. Осы kexgroup парақшасын жүргізу негізінде көп тәжірибе жинадым деуге болады.
– Видеоға түсіруде сізге не қиындық тудырады?
– Негізінен, әр жұмыстың қиындығы оны бастауда деп ойлаймын. Маған видеоны монтаждау қызықты, бірақ сол жұмысты бастау қиын. Дегенмен өзіңізге ұнайтын мамандықпен айналыссаңыз, қанша ұзақ уақытты алғанымен, оны шабытпен, бар махаббатыңызбен жасайсыз.
– Адамға мотивация беретін, оқыған сайын жанданатын, адамға қанат бітіретін сөздер болады ғой. Сіз кімнің айтқанына құлақ түресіз?
– Бауыржан Момышұлының «Дос пен дұшпанға сыр берме» деген нақыл сөзін ұстанамын. Әзілхан Нұршайықовтың «Ақиқат пен аңызын», Бауыржан атамыздың «Ұшқан ұясын» оқып жатырмын. Осы кісінің нақтылығы, турашылдығы, шыншылдығы барша адамзатқа үлгі.
– Мәди, Әбіш Кекілбаев: «Адамды адам еткен – кітап, адамзат еткен – кітапхана» деген екен. Қандай жанрдағы кітаптарды оқыған ұнайды?
– Көркем әдебиет жанрындағы туындыларды оқыған ұнайды. Дулат Исабековтің «Қарғыны» мен «Гауһартасы» есімде ерекше сақталып қалды. Менің ойымша, адам өзіне қажетті, өзінің көкірегіндегі тесікті жабатын, рухани дертінен айықтыратын кітаптарды оқуы керек. Сонда кітаптың көмегі тиеді деп білемін.
– Қандай іспен шұғылданғанда рухани тыныштыққа бөленесіз?
– Оңаша қалғанды ұнатамын. Серуендегенді, жаяу жүргенді, жүгіргенді жақсы көремін. Айта кетейін, жақында еліміздің оңтүстік өңіріне, шырайлы Шымкентке барып келдім. Саяхаттау – адамның өмірін жарқын етеді. Қазақстанның әр өңірін, жерін аралағым келеді. Соның ішінде Шығыс Қазақстанға баса ден қою жоспарымда бар.
Қазіргі кезде подкаст дамып жатыр ғой. Өзіме керекті тақырыптардағы подкастарды тыңдап уақытымды өткіземін.
– Студенттің басты мақсаты не?
– Менің ойымша, студент өзіне берілген төрт жылды барынша тиімді өткізуі керек. Себебі осы уақытта білім арқылы аңсаған мамандығыңыздың білгірі болуыңызға жол ашылады.
– Өмір деген шырғалаң ғой. Өмірде кездесетін қиындықтарды қалай жеңуге болады?
– Ең алғаш оқуға түскенімде 1 балл жетпей, мемлекеттік грантқа ілінбей қалдым. Бірақ бұл мені бір орында тұрақтап қалудан сақтады. Мен жақсы оқуға тырысып, керекті білімді жинастыра бастадым, дамушы ортаға түстім. Осылайша 27 наурызда мен мемлекеттік грантқа ілігіп кеттім. Еңбектің жемісін көру – ғанибет. «Бейнет түбі – зейнет».
– Әңгімеңізге рақмет, Мәди!
Сұхбаттасқан
Бағдат СҰЛТАН,
журналистика факультетінің 4-курс студенті
Басқа жаңалықтар
