Жаңа жылдың Бас мақаласы жөнінде
Мемлекет басшысы Қасым-Жомарт Кемелұлы Тоқаевтың белгілі алаштанушы-ғалым Дихан Қамзабекұлына берген көлемді сұхбаты бүгін еліміздің басты үнпарағы “Егемен Қазақстан” газетіне “Біз озық ойлы ұлт ретінде тек қана алға қарауымыз керек” деген тақырыппен жарияланды.
Бұл мақаланың қоғамдық-саяси маңызы өте зор. Мемлекет басшысы бұл сұхбат-мақаласында 2023 жылғы айтулы оқиғалар мен қоса тарихи оқиғалар төңірегінде де бірқатар пікірлерін білдірді.
Оның ішінде “Алтын орда”, “Қаңтар оқиғасы” төңірегінде де тарихи маңызы бар пікірлерін білдірді.
Президент ол туралы: “Ел тарихында ерекше орны бар тұлғаларға құрмет көрсету дәстүрі еліміздің жалпыұлттық бірегейлігін нығайта түсуге зор септігін тигізеді. Биыл әйгілі ғалым Қаныш Сәтбаевтың туғанына 125, даңқты батырлар Сағадат Нұрмағамбетов пен Рақымжан Қошқарбаевтың туғанына 100 жыл толады. Сонымен қатар тарихшылардың пайымдауынша, Жошы ұлысының іргесі қаланғанына – 800 жыл. Мемлекеттілігіміздің тамыры тым тереңде жатқанын әйгілейтін осы айтулы датаға орай кең ауқымды зерттеулер қолға алынады. Биыл Қазақстан тарихының көптомдығын әзірлеу жұмыстарын да аяқтаймыз. Бұл – өзімізден 200-ден астам, шетелден 60-қа жуық маман жұмылдырылып, тыңғылықты жасалып жатқан үлкен шаруа.
Осындай маңызды оқиғалардан бөлек, күнделікті атқарылуға тиіс жұмыстар да аз емес. Бұл жылдың ел тарихында қандай орын алатыны барша азаматымыздың ерік-жігеріне де байланысты. Мен жаңажылдық құттықтауымда биыл бәріміз тұтас ұлттың өсіп-өркендеуіне куә болатынымызды айттым. Бірақ осы мақсатқа жету үшін біз бір ел болып, білек сыбана жұмыс істеуіміз керек”, - деген ауқымы терең пікірін білдірді.
Сұхбат-мақала соңында Мемлекет басшысы Республика тұрғындарын Жаңа жыл мерекесімен құттықтап, еліне деген ыстық ілтипатын білдірді.
Жақыпбек АЛТАЕВ
Әл-Фараби атындағы ҚазҰУ Философия Кафедрасының профессоры
Басқа жаңалықтар
