Қоршаған орта мәселесіне арналған семинар
«Қоршаған орта химиясы» табиғатпен етене байланысқан ғылым ретінде ХХ ғасырдың 70-жылдарында пайда болды.
Бұл салыстырмалы түрде алғанда, қазіргі экологияның жаратылыстану-ғылыми негізін қалайтын ғылым саласы табиғи физика-химиялық процестерді қамтиды және олар түрлі уақыт шкалаларында қалай көрінетінін сипаттайды. Аталған сала классикалық химияның негізгі заңдары мен ұғымдарына негізделген табиғи жүйелерді, жинақтау механизмдерін, табиғи заттар мен элементтердің трансформациясын, көшіп-қону мүмкіндіктерін қарастырады.
Химиялық экологиядан айырмашылығы – ол ғаламдағы және жер бетіндегі химиялық процестер туралы мәліметтерді, олардың энергетикалық балансы жайлы, сондай-ақ құрылымы, қасиеттері және атмосфераның, гидросфера мен литосфераның құрамы, олардың табиғи күйін, антропогендік әсердің нәтижесінде болған үрдістерді қамтиды. Бұл білім табиғат ресурстарын ұтымды пайдалануға, сонымен қатар оны қорғау шараларын әзірлеп жүзеге асырудың тиімді жолын таба білуге үйретуге өте қажет.
Химия және химиялық технология факультетінде АҚШ-тың Небраска-Линкольн университетінің профессоры Даниел Сноу (Daniel Snow) және отандық ғалымдардың қатысуымен «Қоршаған орта химиясы» тақырыбында ғылыми семинар өтті.
Студенттер жердің геосфераларында болып жатқан химиялық процестерді зерттейтін қазіргі заманғы кешенді ғылым ретінде қоршаған орта химиясының негіздері, алуан қабықтардағы табиғи физика-химиялық және биологиялық процестердің өзара байланысы және оларға адамның әсер ету сипатымен танысты. Сонымен қатар ауа, топырақ, жерүсті және жерасты суларының ластануына байланысты көптеген түйінді мәселелер талқыланды.
Студенттер тарапынан өзекті тақырыптар бойынша сан сұрақ қойылды. Қатысушылар тұшымды жауап қайтарды. Сондай-ақ адамның техногендік әрекетінің әсерінен қоршаған ортаның сапасын және оның өзгеруін бағалау дағдыларын дамыту жайында ақпарат берілді.
Алмагүл НИЯЗБАЕВА,
доцент
Басқа жаңалықтар
