Әсем қаламыз Алматының төрінде түркі әлемінің тұғыры биік тұлғасы, Түркия елінің тарихында өшпес із қалдырған, қазіргі түрік мемлекетінің негізін қалаушы Мұстафа Кемал Ататүрікке ескерткіш орнатылды. Мемлекет басшысы Қ.К.Тоқаев Түркия Республикасының 100 жылдығына орай, Режеп Тайып Ердоғанның Қазақстанға сапары кезінде көрнекті қайраткерге ескерткіш орнату туралы тапсырма бергенді.
Мұстафа Кемал Ататүріктің идеялары мен көшбасшылығы әлі күнге дейін бүкіл әлем халқына рух беріп, шабыттандырып келеді. Барлық түркі халықтары мақтан етер, өнеге тұтар ұлы тұлға. Ол жүзеге асырған мәдени, саяси, экономикалық, әлеуметтік реформалар бүгін де маңызын жоймаған, өміршеңдігімен құнды. Мемлекеттің дамуына негіз болатын реформаларын басқа елдер де нұсқаулық ретінде қолданып келеді. Түркі халқына ортақ даңқты бабамыз Ататүрікті қазақ халқы да ерекше ықыласпен құрметтейді. Ататүрік кезінде Кеңес Одағының құрамында өмір сүріп жатқан туысқан түркі халықтарын ұмытпай, өз халқының есіне салып, өшпестей өсиет қалдырғанын бәріміз білеміз. Бабамыздың 1933 жылы 29 қазанда Түркия Республикасының 10 жылдық мерейтойында сөйлеген сөзі соның бір айғағы. Ататүрік өз сөзінде былай деген: «Бүгін Кеңестер Одағы досымыз, көршіміз, одақтасымыз. Бұл достыққа қазір мұқтажбыз. Бірақ ертең не болатынын ешкім білмейді. Дәл Османлы империясы Австрия, Венгрия сияқты бөлек-бөлек болып бөлінуі мүмкін. Бүгін уыстарынан шығармай қысып ұстаған елдерден айырылып қалуы мүмкін. Әлем жаңа кезеңге өтуі мүмкін. Міне, сол кезде Түркия не істеуі керек екенін білуі қажет... Біздің бұл досымыздың қол астында тілі бір, сенімі бір, өзі (қаны) бір бауырларымыз бар. Оларды қолдауға дайын болуымыз керек. Дайын болу деген сөз – тек сол күнді қол қусырып күтіп отыру емес, дайындалуымыз керек. Елдер бұған қалай дайындалады? Рухани көпірді нығайту арқылы. Тіл – көпір, сенім – көпір, тарих – көпір...», «...Шыққан тегімізге үңіліп, әртүрлі оқиғалар бөліп тастаған тарихымызды түгендеп, біріктіруіміз керек. Олардың бізге келуін күтпеуіміз керек, оларға біз өзіміз баруымыз керек».
Данышпандықпен айтылған риясыз бұл ниет бүгін айна-қатесіз орындалды. Кеңес Одағы ыдырап, Ататүрік айтқандай, уыста ұстаған елдер тәуелсіздігін жариялады. Түркия Қазақстанға құшағын жайды, Қазақ елі де түрік бауырларына есігін айқара ашты. Міне, еліміздің қақ төрінен атамызға айбынды ескерткіш орнатылды.
Шынарай БҮРКІТБАЕВА,
PhD
Хаят АРАС,
магистр
Түркітану және тіл теориясы кафедрасы
Басқа жаңалықтар
