Ғази университетіндегі тағылымдама
Шетелдік ғылыми тағылымдамадан өту – докторанттардың ғылыми-зерттеу жұмысының аясындағы міндеттің бірі. Осыған орай, философия және саясаттану факультеті Педагогика және білім беру менеджменті кафедрасының «Педагогика және психология» мамандығының 2-курс докторанттары Е.Әбдіжәділ, Т.Хасенқызы, осы жолдардың авторы, сондай-ақ «Әлеуметтік педагогика және өзін-өзі тану» мамандығының 2-курс докторанты Б.Санбаева кезекті ғылыми тағылымдаманы Анкара қаласындағы Ғази университетінде өттік.
Ғылыми тағылымдама кезінде ғылыми және кәсіби құзыреттілікті, зерттеушілік дағдыларды мақсатты түрде жетілдіру әрі ғылыми білімді тереңдету жататыны белгілі. Тағылымдамадан өту барысында Ғази университетінің профессоры Южел Гелешли мырзамен және профессор Хаяти Акиол мырзамен ғылыми жұмысымыздың жазылу барысын талқылудан бөлек, халықаралық деңгейде жазылып жатқан мақалалардың, одан басқа түрлі ғылыми жұмыстардың әдістерімен таныстық. Тақырыбымызға байланысты зерттеу жүргізу барысында ғылыми жұмысымыздың аясында Ғази университетінде оқып жатқан қазақ студенттерімен кездесіп, эксперименттік (сауалнама алу, сұхбаттасу т.б.) жұмыстар жүргізілді. Ғази университеті ректорының орынбасары, профессор Южел Гелешли мырза барлық жағдайды ұйымдастырды.
Бұған қоса, Ғази университетінің студенттері ұйымдастырған «Эрасмус+» жобасы аясында өткен көрмеге қатыстық әрі ғылыми-зерттеу жұмысымыздың төңірегінде іздену барысында Түрік мемлекетінің, Анкара қаласында орналасқан ең үлкен «Президенттік ұлт» кітапханасында жұмыс істеу бұйырды. Сонымен қатар осы тағылымдама барысында Ғази университеті Білім беру кафедрасының ұжымына өзіміздің Әл-Фараби атындағы ҚазҰУ-дың 90 жылдығына арналған «Болашақ университеті» атты презентациясымен қоса, Педагогика және білім беру менеджменті кафедрасы ғалымдарының соңғы шығарған еңбектерімен таныстыру көрмесі өтті.
Сөйтіп, Анкара қаласында өткізген ғылыми тағылымдамамыз есімізде қалатыны сөзсіз. Білім алушыларға, ізденушілерге осындай қолдау көрсетіп, жағдай жасап отырған ҚР Ғылым және жоғары білім министрлігі мен ҚазҰУ-ға айтар алғысымыз шексіз.
Айым МӘСІМБАЕВА,
Педагогика және білім беру менеджменті кафедрасының докторанты
Басқа жаңалықтар
