Жаздың жаңбырлы күндерінің бірінде мен тыныштықты қалап, кітап әлеміне саяхат жасау үшін жайлы кітапханада уақыт өткізуді жөн көрдім. Кітапхананың жалпы ауаны маған қатты ұнайды. Сондықтан онда жиі баруға тырысамын. Таяу арада ҚазҰУ-ға талапкерлер ағылады. Сол себепті түлектер назарына университет кітапханасы жайлы шағын ақпарат беруді жөн санадым.
ҚазҰУ-дың Фараби кітапханасында кітап қоры мол. Қор жағынан еліміздегі ЖОО-лар арасында көш бастайды. Кітапхана жай ғана әсем ғимарат емес, нағыз білім ошағы. Фараби кітапханасында студенттер мен оқытушылардың білімін жетілдіруге, қажет оқулықтар мен ақпаратты табуға, мерзімді басылымдармен танысуға бар мүмкіндік жасалған. Мұнда интернет желісін де емін-еркін пайдалана аласың. Тізілген кітап стеллаждары көз тартады. Одан кез келген кітапты таңдап алып, электронды түрде оқуға болады немесе ұялы телефон арқылы университет сайтына кіріп, керек оқулықты пайдалана аласыз.
Фараби кітапханасында бірнеше бөлім бар, олардың әрқайсысының өз функциясы бар және белгілі бір аудиторияға қызмет етеді. Мысалы, оқырмандарға қызмет көрсету бөлімінде кітапханашылар оқырманға қызмет көрсетеді. Олар келушілерге қажетті кітаптарды табуға көмек береді. Әдебиеттерді беруді және қайтаруды ұйымдастырады, ақпараттық іздеуге кеңес береді. Каталогтау және жіктеу бөлімі – кітап қорын сипаттау және жүйелеумен, кітаптарды оңай іздеу үшін каталогтар құрумен айналысады. Ал электрондық ресурстар бөлімі – электрондық дерекқорға, журналдар, электрондық кітаптарға және басқа да онлайн ресурстарға қол жеткізуді қолдауға жауапты. Сирек кітаптар мен қолжазбалар бөлімі құнды басылымдарды, көне кітаптар мен қолжазбаларды сақтауға және оларға қол жеткізуге арналған. Кітапхана аралық абонемент бөлімі басылымдарды басқа кітапханалармен бөлісумен айналысады, басқа кітапханалардан әдебиет алуға мүмкіндік береді.
Кітапханада тек оқу залдары ғана емес, мұражай да бар. Ол Қазақстанның мәдени және тарихи мұрасын сақтауға, насихаттауға, сондай-ақ білім мен ғылым саласындағы жетістіктерді көрсетуге ұмтылатын руханият ордасы. Мұражай қызметі елімізбен бірге, одан тыс жерлерде де бәсекеге қабілетті және рухы мықты гуманитарлық мамандардың қалыптасуына ықпал етеді.
Елназ КЕРІМТАЙ,
журналистика факультетінің 2-курс студенті
Басқа жаңалықтар
