Желден жүйрік Жандос ағай

Салауатты өмір салты мен ден­сау­лық­ты насихаттаған Орталық Азия­да­ғы ең ірі спорттық шара – Алматы ма­ра­фоны болып өтті. Бұл спорттық шара Алматы қа­ласында 2012 жыл­дан бері ұйым­дас­тырылып келеді. Алғашында оған 500 алматылық спортшы қатысса, 13-ші рет өткізіліп отырған бұл халықаралық сайысқа әлемнің 60-қа жуық елінен 16,5 мың­нан астам спортсүйерлер қатысты. Дәстүрлі Алматы марафоны спорттық шара ғана емес, қайырымдылық баста­ма ретінде де танылған.

Алматы марафоны туралы не білеміз?

Жарыс бірнеше қашықтықты қамтиды: Ең ұза­ғы – 42,2 км. Кәсіби спортшылар мен ма­ра­фонға дайын­далған әуесқойлар үшін өте қолайлы. Орта қашықтық – 21,1 км. Бұл кәсіби спорт­шылармен қатар, спортты сүйетін әуес­қой­лар арасында кең танымал. Үшінші қашықтық – 10 км және 5 км. Бұл қашықтықтар – денсаулығын шыңдағысы келетін кез келген адамға арналған. Алматы марафоны 2013 жылдан бері AIMS (Халықаралық марафон және жүгіру ассоциациясы) тізіміне енеді.

Аталған ауқымды іс-шараға Әл-Фараби атын­дағы Қазақ ұлттық университетінің тарих фа­куль­теті Қазақстан тарихы кафедрасының доценті  Жандос Құмғанбаев та қатысты. 38 жастағы Жан­дос Жұмалбекұлы орта қашық­тық­тағы 21,1 ша­қы­рымды 2 сағат 20 минутта жүгіріп өтіп, уни­вер­ситет намысын қорғады. Сөйтіп, ұстазымыз жарыс жеңімпаздарының қатарынан көрінді. Бұл марафон Жандос Жұмалбекұлы үшін тек спорттық сайыс қана емес, сондай-ақ университет ұжы­мының абы­ройын асқақтатқан оқиға болды. Фи­зи­калық дайындықтан бөлек, рухани әлеуетті қажет ететін бұл жеңіс ұстаздың білімі мен тә­жі­рибесінің жоғары екенін көрсетсе, қиын­дық­тарға төтеп беруі оның спортта да жоғары же­тістіктерге жете алатынын дәлелдеді.

Жандос Жұмалбекұлы 1986 жылы 18 қаң­тар­да Жамбыл облысы Байзақ ауданының Ди­қан ауы­лын­да дүниеге келген. Қазіргі уа­қытта ҚазҰУ-да  жас ұрпаққа білім беріп, тәр­бие­леу жолында тын­бай еңбек етіп, бәсекеге қабілетті мамандарды даярлауда белсенділік та­нытып жүр. Студенттерге жетекшілік қызме­ті­мен қатар, ғылыми-зерттеу жұмыстарын да ұтымды ұйымдастырып, факуль­тет­тің да­муына оң ықпал етуде. Ж.Құмғанбаев бірнеше ұжымдық монографияның, 20-дан астам ғылыми мақаланың және Scopus базасындағы журналдарда жарық көрген мақалалардың ав­то­ры. Доцент Жандос Жұмалбекұлы өзінің Алматы марафонындағы бұл жеңісін 1 қазанда алғаш рет елімізде аталып өткен  Жоғары білім қызметкерлері күніне орай, факультет ұстаз­да­рына арнады.

Мөлдір РАХМЕТОВА,

 «Тарих» мамандығының

1-курс магистранты