«Табиғи-техногендік қауіп-қатерлер» мамандығының 2-3 курс студенттері арасында «Батыс Қазақстандағы су тасқынының себебі мен салдары» тақырыбында ашық кураторлық сағат өтті. Іс-шара Тұрақты даму мақсаттарының 15-ші (Құрлық экожүйелерін қорғау) және 13-ші (Климат өзгеруімен күрес) тармақтарына сәйкес ұйымдастырылды.
Тақырыпқа сәйкес, аталған аймақта зерттеу жұмыстарын жүргізуге атсалысқан Метеорология және гидрология кафедрасының аға оқытушысы Алмат Нұрбақұлы арнайы шақырылды. Ол өзінің баяндамасында Батыс Қазақстанда су тасқынының негізгі себептерін, оның салдарын және шешу жолдарын қарастыру экожүйені қорғауға және климат өзгерісімен күреске бағытталған маңызды шаралардың бірі деп атап өтті. Сонымен қатар аталған аймақта жүргізілген жазғы зерттеу жұмыстарымен таныстырып, көптеген видеотаспаларды студенттер назарына ұсынды.
Су тасқынының алдын алу және салдарын азайту үшін бірнеше шараны қолға алу қажет. Ең алдымен, табиғи экожүйелерді қорғау, атап айтқанда орманды қалпына келтіру және өзен арналарын табиғи қалпында сақтау маңызды рөл атқарады. Бұл топырақтың су сіңіру қабілетін арттырып, су тасқыны қаупін төмендетеді. Сонымен қатар гидротехникалық құрылыстарды (дамбалар мен бөгеттер) салу және жаңғырту арқылы су тасқынын бақылау мүмкіндігі артады.
Климат өзгерісімен күрес аясында атмосфераға парниктік газдардың шығарылуын азайту және энергияның жаңартылатын көздерін пайдалану да су тасқыны мәселесін шешуге көмек береді. Сондай-ақ халықты ақпараттандыру және төтенше жағдайларға дайындық шараларын ұйымдастыру арқылы су тасқынының салдарымен күресуге болады.
Батыс Қазақстандағы су тасқынының себептері көп және оларды шешу кешенді тәсілді талап етеді. Экожүйелерді қорғау, климат өзгерісімен күресу және дұрыс жоспарлау арқылы біз су тасқынының теріс әсерін азайтып, өңірдің тұрақты дамуына қол жеткізе аламыз.
Студенттер елімізде кездесетін түрлі табиғи және техногендік қауіптерді болжау, алдын алу және себеп-салдарымен күресу саласының болашақ мамандарына қажетті көптеген мағлұматтар алды.
Ақерке ТАЛҒАТҚЫЗЫ,
«Табиғи-техногендік қауіп-қатерлер» мамандығының 2-курс студенті
Басқа жаңалықтар
